Պռոշյանցիները բացեցին ճանապարհը. վաղը կառավարությունում հանդիպում կունենան

Ինչպես արդեն հայտնել ենք, Պռոշյանի և Քասախի բնակիչները փակել էին Աշտարակի մայրուղին և պահանջում էին Երևանի քաղաքապետ Տիգրան Ավինյանի հետ հանդիպում: Նրանք բողոքում էին տրանսպորտի հարցի շուրջ, քանի որ Երևանի տրանսպորտն այլևս չի սպասարկելու մարզերի բնակիչներին:

Քիչ առաջ ակցիայի մասնակիցները բացեցին ճանապարհը և այժմ իրենց բողոքի ակցիան շարունակում են Պռոշյանի մշակույթի տանը։

«Վաղը մեր խմբից 4 հոգու կառավարությունում կընդունեն ու այնտեղ կհիմնավորենք մեր պահանջները, ցույց կտանք նաև GPS-ով տարածքը։ Եթե չընդունեն մեր առաջարկը, ապա դրանից հետո ավելի շատով կհավաքվենք. աշակերտներն էլ դպրոց չեն գնա, Երևան գնացողները, այս ճանապարհին աշխատողները կմիանան մեզ»,– նշեց բողոքի ակցիայի մասնակիցներից մեկը։