Գոհ չենք Սամվել Վարդանյանի վճռից, խուլիգանության մասով վճիռ եղավ, մինչև 2 տարվա կալանք է ենթադրում․ Մելիքյան

Այսօրվա վերդիկտը ես համարում եմ նաև ձեր բոլորի հաղթանակը։ Այս մասին դատական նիստից հետո լրագրողների հետ զրույցում ասաց Սամվել Վարդանյանի պաշտպան Ռուբեն Մելիքյանը։

«Պետք է ասեմ, որ գոհ լինել չենք կարող վերդիկտից, որովհետև եթե պաշտպանները միջնորդում են դատարանին արդարացնել երկու մեղադրանքով էլ, բայց երբ մեկ մեղադրանքով է տեղի ունենում արդարացումը, գոհ լինել չենք կարող»,– ասաց նա։

Մելիքյանը հստակեցրեց, որ խուլիգանությունով եղավ մեղադրական վերդիկտ, որը ոչ մեծ ծանրության արարք էր, նախատեսում է մինչ 2 տարի ժամկետով ազատազրկում, բայց միևնույն ժամանակ կա ևս մեկ հոդված Քրեական օրենսգրքում, համաձայն որի՝ առաջին անգամ ոչ մեծ ծանրության արարք կատարած անձին արգելվում է նշանակել ազատարզկում։ «Իսկ մյուս հոդվածով, որը միայն ազատազրկում էր նախատեսում՝ 1–ից 4 տարի ժամկետով, ատելության խոսքը, դատարանը կայացրեց արդարացման վերդիկտ։ Մյուսի մասով մենք անպայման բողոքարկելու ենք»,– նշեց պաշտպանը։

Նշենք, որ ԱԺ պատգամավոր Հակոբ Ասլանյանի հետ միջադեպի գործով Երեւան քաղաքի առաջին ատյանի ընդհանուր իրավասության քրեական դատարանը կայացրեց մեղադրական վճիռ գործով մեղադրյալ Սամվել Վարդանյանի նկատմամբ:

Դատարանը որոշեց Վարդանյանին մեղավոր ճանաչել Քր. օրենսգրքի 297 հոդվածի 1-ին մասով նախատեսված հանցանք կատարելու մեջ (խուլիգանություն), իսկ Քր օրենսգրքի 329 հոդվածի 2-րդ մասի 3-րդ կետի կատարման մեջ ճանաչել անմեղ (ատելության խոսք):

Հիշեցնենք, որ նախորդ տարվա ապրիլի 15-ին Ազգային ժողովի (ԱԺ) նախագահ Ալեն Սիմոնյանը տեսանյութ էր հրապարակել, որտեղ Սամվել Վարդանյանը հասարակական տրանսպորտում վիրավորում էր այդ ժամանակ ՔՊ-ական պատգամավոր Հակոբ Ասլանյանին, նրան անվանում «հակահայ վիժվածք»։ Վարդանյանին անհապաղ ձերբակալեցին, ապա ՁՊՎ-ից Քննչական կոմիտե տեղափոխվելու ճանապարհին նրան մեքենայից իջեցրել էին դիմակավորված անձինք և ծեծի ենթարկել։ Հարուցվեց քրեական վարույթ, բայց մինչ այսօր ո՛չ մեղադրյալ կա, ո՛չ նույնականացված ոստիկան: