Գագաուզիայի ղեկավարի պաշտոնակատարը կոչ է արել չենթարկվել Մոլդովայի իշխանություններին

Գագաուզիայի գործադիր կոմիտեի ղեկավարի պաշտոնակատար Իլյա Ուզունը կոչ է արել քաղաքացիական անհնազանդություն հայտարարել Մոլդովայի իշխանություններին՝ Գագաուզիայի ղեկավար Եվգենյա Գուցուլի դատապարտման ֆոնին։ Նրա հայտարարությունն արվել է Գագաուզիայի խորհրդարանի արտահերթ նիստի ընթացքում և հեռարձակվել է կառույցի պաշտոնական կայքով։

Ուզունը նշել է, որ «Գործողություն և համերաշխություն» կուսակցությունը՝ Մոլդովայի նախագահ Մայա Սանդուի գլխավորությամբ, «դիտավորյալ գլխատել է Գագաուզիան»՝ քաղաքական դրդապատճառներով ազատազրկելով նրա ընտրված ղեկավարին։ Նա առաջարկել է միջազգային կառույցներում պաշտպանություն փնտրել՝ «ճշմարիտ ժողովրդավարության համար, որտեղ տեղ չկա բռնապետության և քաղաքական հետապնդման համար»։

Հիշեցնենք, որ օգոստոսի 5-ին Քիշինևի դատարանը Գուցուլին դատապարտել է յոթ տարվա ազատազրկման՝ արգելված «Շոր» կուսակցության ֆինանսավորման մեղադրանքով։ Գուցուլը դա որակել է որպես «քաղաքական հաշվեհարդար» և հայտարարել պայքարի շարունակության մասին։ Մոլդովայում վերջին շրջանում սրվել է ճնշումը ընդդիմության և ազատ մամուլի հանդեպ՝ փակվել են տասնյակ լրատվամիջոցներ և ձերբակալվել ռուսամետ քաղաքական գործիչներ։