2 տարի շարունակ հետևել են մեզ, ու չեն կարողացել գտնել մի փաստ, որով կարող էին գործ հարուցել. Գառնիկ Դանիելյան

Ակնհայտ է, որ իրավապահներն գիտեին, թե ինչ կա ձայնագրության մեջ, բայց ձայնագրության բովանդակությունը կտրել էին, մոնտաժել էին, որ գործ հարուցեն։ Դուք կարծում եք ՔՊ խմբակցությունը չգիտե՞ր այդ ձայնագրությունների բովանդակության մասին։ Այս մասին Բագրատ սրբազանի և մյուսների գործով դատական նիստից առաջ լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը։ 

«ՀՀ-ում բոլոր ուժային կառույցները 2 տարի շարունակ հետևել են Սրբազան շարժման ակտիվ դերակատարների և առաջնորդների խոսակցությունները և տեղաշարժը։ Տենց օր չի եղել, որ մենք չզգանք հետապնդման մասնակիցներին, մենք ամբողջ օրը զգացել ենք իրենց ներկայությունը, որքան էլ փորձել են թաքցնել իրենց ներկայությունը՝ թե կեցավայրի մոտ, թե մի կետից մյուս կետը տեղափոխվելով։ Բայց ամբողջ 2 տարվա մեջ չեն կարողացել գտնել մի փաստ, որով կարող էին գործ հարուցել, վերցրել են մոնտաժված ձայնագրություններ, «պոլի փետը», կոշիկի մեխը, ինչ որ ճանապարհային նշան և դրա վրա հայտարարել են, որ փորձել ենք կառուցել հեղափոխություն։ 

Ուզում եմ հիշեցնել, որ անգամ ՊՊԾ գնդի գրավման ժամանակ նման որակավորում չի տրվել որ ահաբեկչություն է նախապատրաստել։ Հանրությունը պետք է գնահատական տա, պետք է նայի, տեսնի ինչ կեղծարարների, ստախոսների, թրքահպատակ ոչնչությունների հետ գործ ունի»,-ասաց Դանիելյանը։