Ուկրաինայի շուրջ արագ լուծումներ չեն սպասվում, բայց փոքր քայլեր հնարավոր են

ՌԴ Դաշնային խորհրդի միջազգային գործերի կոմիտեի փոխնախագահ Անդրեյ Կլիմովը հայտարարել է, որ Ուկրաինայի շուրջ բանակցություններում արագ և շրջադարձային լուծումներ չկան ու մոտ ապագայում չեն էլ սպասվում։ «Լենտա.ռու»-ի հետ զրույցում նա ընդգծել է, որ որոշակի առաջընթաց կարող է լինել միայն այն դեպքում, եթե Կիևը համաձայնի աշխատել այն մասնագիտական խմբերի ձևաչափով, որոնք առաջարկել է Մոսկվան։

Կլիմովի խոսքով՝ ռուսական կողմը չի հրաժարվել այդ մեխանիզմից, և նման խմբերի ստեղծման շուրջ պայմանավորվածություններ արդեն գոյություն ունեն։ Նա նշել է, որ եթե ուկրաինական կողմը ներգրավվի այդ աշխատանքում, հնարավոր կլինի «փոքր շարժ» ապահովել գոնե այդ մակարդակում։

Սակայն այս պահին նման գործընթաց չի դիտվում։ Սենատորը հավելել է, որ դեռևս հստակ չէ՝ Արևմուտքը արդյոք կստիպի Կիևին ակտիվացնել բանակցային գործընթացը, քանի որ Վաշինգտոնի վերջին առաջարկները զարգացում չեն ստացել։ «Արագ առաջընթաց չեմ սպասում, բայց որոշ փոքր քայլեր հնարավոր են»,— եզրափակել է Կլիմովը։