Ինչպես պահպանել սուր միտք և լավ հիշողություն. Գերիատր Իլնիցկի

Կոգնիտիվ ունակությունները պարտադիր չեն թուլանալ տարիքի հետ․ շատ բան կախված է ապրելակերպից, ընդգծում է թերապևտ և գերիատր Անդրեյ Իլնիցկին։ aif.ru-ի հետ զրույցում նա նշել է, որ ուղեղը մշտական մարզման կարիք ունի, ուստի կարևոր է շարունակ սովորել, կարդալ, ստեղծագործել և զբաղվել մտավոր վարժություններով։

Բժիշկը նաև խորհուրդ է տվել տարեցներին վարել ակտիվ կենսակերպ՝ քայլել մաքուր օդում, զբաղվել մարմնամարզությամբ կամ լողով։ Նրա խոսքով՝ ճիշտ սնունդը նույնքան կարևոր է․ սննդակարգում պետք է գերակշռեն բանջարեղենը, ձուկը և ընկույզը, իսկ շաքարի ու աղի քանակը նվազագույնի հասցվի։

Իլնիցկին նշել է, որ ուղեղի արագ ծերացումը հաճախ պայմանավորված է չբուժված քրոնիկ հիվանդություններով, հատկապես՝ շաքարային դիաբետով ու հիպերտոնիայով։ Մտավոր ունակությունների վրա բացասաբար են ազդում նաև դեպրեսիան և սոցիալական մեկուսացումը, ուստի տարեցներին անհրաժեշտ է պահպանել ակտիվ և լիարժեք կյանք՝ ինչպես ֆիզիկապես, այնպես էլ հոգեբանորեն։