Հնարավոր է ռազմական բժիշկների գործադուլ

Լուրեր.com-ի տեղեկություններով՝ ՊՆ կենտրոնական կլինիկական զինվորական հոսպիտալի (ԿԿԶՀ) անձնակազմը, երեկ «Հարսնաքար» ռեստորանային համալիրում տեղի ունեցած միջադեպի ժամանակ բուժծառայության մայոր Վահե Ավետյանին դաժան ծեծի ենթարկելու հետ կապված, որոշում է ընդունել գործադուլ հայտարարել, քանի դեռ Ավետյանին ծեծի ենթարկածներն ու նրանց հովանավոր բարձրաստիճան պաշտոնյաները չեն ենթարկվել պատասխանատվության։

Նշենք նաև, որ եթե ԿԿԶՀ անձնակազմը գործադուլ հայտարարի, կստեղծվի շատ դժվարին իրավիճակ. ՀՀ զինված ուժերը կմնան առանց իրենց բուժանձնակազմի։

Հիշեցնենք, որ ինչպես ավելի վաղ հայտնել էր Lurer.com-ը, երեկ՝ 23:00-ին, «Հարսնաքար» ռեստորանում ՀՀ ԱԺ պատգամավոր Ռուբեն Հայրապետյանի անվտանգության աշխատակիցները նրա իսկ ցուցումով ծեծի էին ենթարկել ՀՀ ՊՆ Երևանի կայազորի հոսպիտալի Ուրոլոգիայի բաժնի պետ, մայոր Վահե Ավետյանին, որը տեղափոխվել էր Մուրացանի զինվորական հոսպիտալ և գիշերը ենթարկվել գանգուղեղի վիրահատության։