Քասախ գետն ընկած արցախցի 4-ամյա Նոյը ընտանիքի միակ երեխան էր. մանրամասներ ողբերգական դեպքից (տեսանյութ)

Ինչպես հայտնել էինք, ապրիլի 27-ին, ժամը 17։47-ին ՆԳՆ ահազանգ էր ստացվել, որ Օշական գյուղում՝ Քասախ գետի կամրջի հարևանությամբ, 4 տարեկան երեխան ընկել է գետը:

Որոնողափրկարարական աշխատանքներն իրականացվել էին Օշականից Ոսկեվազ ընկած հատվածում՝ Քասախ գետի երկայնքով (8-10 կմ)։

Օշական գյուղի կամրջի մոտակայքում՝ գետում, ոստիկանության ծառայողներն ու քաղաքացիները հայտնաբերել էին երեխային, դուրս բերել գետից և մոտեցրել Շտապօգնության ավտոմեքենային։ Բժշկական կենտրոն հոսպիտալացման ճանապարհին արձանագրվել էր երեխայի մահը։

«Արցախից եկած ընտանիք են, ոսկի մարդիկ են: Թոռիս ընկերն էր Նոյը... էնքան լացեցինք, որ իմացանք: Գնացել էին ընտանիքով բնության գրկում զբոսնելու: Մայրն ասում է՝ կողքիս չէր երեխան, մտածեցի՝ հոր կողքին է, հետո տեսա՝ հոր կողքին էլ չէ: Ման եկանք, էլ վերջ, ընկել էր գետը... Էնքան ճարպիկ, խելացի երեխա էր, այդ օրն առավոտյան տեսել էի, ջերմ զրուցել»,- News.am–ին ասել է Կոշի բնակչուհի Ռոզա Բադալյանը: