Ինչո՞ւ մեր գեղեցիկ ու մաքուր սերն անավարտ մնաց. սեպտեմբերի 29-ին կլրանա Լևոն Սևոյանի մահվան տարելիցը

Հասարակություն 28 Սեպտեմբեր, 2021 14:40

Կյանքը հայրենիքին նվիրած Սևոյան Լևոնի մահվան տարելիցը կլրանա սեպտեմբերի 29-ին: Հերոսը ծնվել է 1994 թվականի մայիսի 14-ին Վարդենիս քաղաքում: Այս մասին ԼՈՒՐԵՐ.com -ի հետ զրույցում ասաց Լևոնի կինը՝ Աստղիկ Խաչատրյանը:

«2012-2014 թթ. ամուսինս ծառայել է ՀՀ ՊՆ Տավուշի Թովուզ զորամասում: Ծառայության ընթացքում խրախուսվել է հրամանատարության կողմից կրծքանշաններով ու պատվոգրերով: Հայրենիքը պաշտպանելու կամքն ու նվիրումն այնքան մեծ էր, որ Լևոնը 2017թ.-ին կամավորագրվեց պայմանագրային զինծառայության...»,- հպարտությամբ պատմում է հերոսի կինը:

Վերջինս իրենց սիրուն տվել է «տխուր և անավարտ» անվանումը. «16 տարեկան էի, երբ խենթի նման սիրահարվել էի Լևոնին։ Սկսեցինք ընկերություն անել, դեռ դպրոցական էի։ Մեր ընկերությունը տևեց 6 տարի։ Անցել ենք շատ ու շատ դժվարությունների միջով։ Շատ մարդիկ դեմ էին մեր ամուսնությանը, բայց մեզ ոչինչ չխանգարեց իրար հասնելուն, քանի որ շատ էինք սիրում միմյանց։ Ամուսնացանք 6 տարի ընկերություն անելուց հետո, սակայն, միասին ապրեցինք ընդամենը 3 տարի, քանի որ սկսվեց այդ չարաբաստիկ պատերազմը»,- ցավով ասաց Աստղիկը։

Հերոսն ունի 2 աղջիկ, հանուն որոնց խաղաղ կյանքի մեկնեց ռազմի դաշտ. «Երբ ամուսինս զոհվեց, մեծ աղջիկս այդ ժամանակ 1,5 տարեկան էր, փոքրս՝ 3 ամսական։ 1 տարի անց ամեն օր ինձ հարց եմ տալիս՝ ինչու մեր գեղեցիկ ու մաքուր սերն անավարտ մնաց, ու հասկանում եմ, որ մեր սերը հեքիաթ էր, ինչպես բոլոր հեքիաթներում՝ մեր հեքիաթն էլ սկսվեց «ԼԻՆՈՒՄ Է, ՉԻ ԼԻՆՈՒՄ»-ով»,- ցավով նշեց Լևոնի կինը։

Լևոն Սևոյանը զոհվեց թշնամու արձակած ԱԹՍ-ի հարվածից պատերազմի 2-րդ օրը՝ սեպտեմբերի 29-ին, այն ժամանակ, երբ օգնում էր իր վիրավոր ընկերներին:

Զվարթ Պետրոսյան