«Հրապարակ». «Ո՞ր իշխանությունը կդիմանա մի ամբողջ ժողովրդի»

Ոչ իշխանական եռյակն անհասկանալի դադար է վերցրել բոլոր առումներով, հիմա էլ կասկածի տակ են դրվում նոյեմբերի 7-ին հանրահավաք անցկացնելու, ինչպես նաեւ մարզերում շտաբներ ստեղծելու հարցերը: Գրում է «Հրապարակ»-ը:

Հոկտեմբերի 24-ի հանրահավաքի ընթացքում Գագիկ Ծառուկյանը հայտարարեց մարզային շտաբներ ստեղծելու մտադրության մասին՝ շարժումը մարզեր հասցնելու եւ մոբիլիզացնելու նպատակով: Եվ քանի որ այս գործի թե կազմակերպչական, թե ֆինանսական հարցերը հիմնականում ԲՀԿ-ի ու ԲՀԿ-ական պատգամավորների ուսերին են դրված, արմավիրցի Ռուստամ Գասպարյանի հետ զրույցում թերթը փորձեց հասկանալ, թե ինչու է դադար առել եռյակի համաժողովրդական շարժումը: Գասպարյանը նշեց, որ դեռ հստակ որոշված չէ՝ նոյեմբերի 7-ին հանրահավաք լինելու է, թե ոչ:

- Պարոն Գասպարյան, մի քանի մարզերի պատգամավորներ հաստատել են, որ դեռեւս մարզային շտաբներ չեն բացվել, ինչո՞ւ, եւ ի՞նչ պետք է անեն այդ շտաբները:

- Ըստ էության, շտաբներ կան բացված, որովհետեւ կուսակցական գրասենյակներ բոլոր տեղերում էլ կան, հիմա ճշտվում է՝ ինչ ֆորմատով, ինչ ձեւով պետք է այդ աշխատանքները տարվեն, ինձ թվում է՝ առաջիկայում պարզ կդառնա: Իսկ հնարավոր է նաեւ չստեղծվի, դա ռազմավարություն է, եւ չեմ ուզում ասել՝ կոնկրետ ինչ ենք որոշում:

- Եռյակի գործողություններում նկատելի անորոշությունը եւ հանրահավաքի հետաձգումն ինչպե՞ս կբացատրեք:

- Դե, տակտիկա է երեւի, իսկ տարաձայնությունների մասին լուրերը պատերի տակի խոսակցություններ են, չար լեզուների:

- Իսկ հաջորդ հանրահավաքին ի՞նչ պետք է սպասել, քանի որ Դուք նաեւ Ազատամարտիկների դաշինքն եք ներկայացնում, որտեղից ռադիկալ գործողությունների պահանջ է հնչում, իսկ որոշներն էլ խոստացել են մինչեւ տարեվերջ իշխանափոխություն իրականացնել, պարզե՞լ եք՝ լիդերները պատրա՞ստ են ռադիկալ քայլերի, թե՞ թավշյա հեղափոխություն եք անելու:

- Դե գիտեք, նախկինում բազմաթիվ անգամներ արել են նման քայլեր ու երեւի նախկինում արված սխալները չեն ուզում կրկնել, այլ ուզում են օրինական, սահմանադրական ճանապարհով հասնել:

- Իսկ այլ կերպ, խաղաղ ճանապարհով իշխանափոխություն պատկերացնո՞ւմ եք:

- Ինչի, Վրաստանում չեղա՞վ նման բան, վարդերով հեղափոխությունը: Եթե ամբողջ ազգն է կանգնելու ոտքի ու պահանջելու, ո՞ր իշխանությունը կդիմանա մի ամբողջ ժողովրդի:

Շարունակությունը՝ թերթի այսօրվա համարում: