Սկսվել է նոր` «Սյունիքֆուդ» պահածոների գործարանի շինարարությունը

Կապան քաղաքից 6 կմ հեռավարությամբ գտնվող Սյունիք համայնքում սկսվել է նոր' «Սյունիքֆուդ» պահածոների գործարանի շենքի կառուցումը: Սյունիքի մարզպետ Սուրիկ Խաչատրյանի, Կապանի քաղաքապետ Աշոտ Հայրապետյանի մասնակցությամբ մեծ հանդիսավորությամբ նոյեմբերի 4-ին կատարվեց շենքի հիմնարկեքի արարողությունը' Քաջարանի տարածաշրջանի հոգևոր հովիվ տեր Շիրակ քահանայի ձեռամբ:

Մարզպետ Սուրիկ Խաչատրյանի խոսքով' նախատեսվում է սեղմ ժամկետներում գործարկել պահածոների գործարանը, որտեղ մշտական աշխատանքով կապահովվի մոտ 200 մարդ' հիմնականում կանայք: Բացի դրանից, իրականացվող ծրագրի շրջանակում նախատեսվում է գործարանի հարևանությամբ, 1,5 հա տարածքում ստեղծել ջերմոցային տնտեսություն, որի աշխատանքներում կներգրավվի ևս 300 մարդ: Կլինեն նաև մարդիկ, ովքեր մրգերի ու հատապտուղների, բանջարեղենի մթերման աշխատանքներին կմասնակցեն:

Ըստ մարզպետի' ՀՀ վարչապետ Հովիկ Աբրահամյանն արդեն համապատասխան հանձնարարականներ է տվել ՀՀ գյուղնախարար Սերգո Կարապետյանին: Ծրագիրը հավանության է արժանացել ՀՀ կենտրոնական բանկի կողմից: «Սա լուրջ նախաձեռնություն է, և մի քանի ամիս հետո արդյունքները կտեսնենք: Ունենք այլ ծրագրեր ևս, նախատեսել ենք մարտ ամսին մարզում սկսել մի նոր ծրագիր, որը հնարավորություն կտա աշխատանքով ապահովել ոչ թե հարյուրավոր, այլ հազարավոր մարդկանց», - ասաց մարզպետը' միաժամանակ նշելով, որ անցած դարի 90-ական թվականներին Կապանում կար մոտ 20 հազ աշխատատեղ, իսկ այս օր այդ թիվը մի քանի անգամ նվազել է: Ամեն ինչ պետք է անել, որպեսզի վերականգնվեն այդ աշխատատեղերը: Հիմնվելիք պահածոների գործարանի սարքավորումները և պահածոների պատրաստման տեխնոլոգիաները, պատասխանատուների հավաստմամբ, լինելու են ժամանակակից եվրոպական չափանիշներին համապատասխան, իսկ արտադրանքի իրացման շուկան հիմնականում լինելու է ՌԴ-ն, որի մի շարք ընկերությունների հետ արդեն կան նախնական պայմանավորվածություններ:

Նախատեսվում է գործարանի կառուցումն ավարտել եկող տարվա գարնանը: Սյունիքում այս աննախադեպ ծրագիրն իրականացվում է ՀՀ կառավարության աջակցությամբ, վարկային ծրագրով' Սյունիքի մարզպետի նախաձեռնությամբ:

Գոհար Իսախանյան