Կարեն Նազարյանը Տրայան Հրիսթեային հիշեցրեց, որ նախապայմաններ առաջադրել է ոչ թե Հայաստանը, այլ Թուրքիան

Տասնամյակներ շարունակ Թուրքիան է փակ պահում Հայաստանի հետ սահմանն ու հարաբերությունների կարգավորմանն ուղղված նախաձեռնության ժամանակ էլ հենց այդ երկիրն առաջադրեց նախապայմաններ: Սա ՀՀ ԱԳ փոխնախարար Կարեն Նազարյանի պատասխանն է Հայաստանում ԵՄ պատվիրակության ղեկավար դեսպան Տրայան Հրիսթեայի այն դիտարկմանը, թե Եվրամիությունը կարևորում է հայ-թուրքական հարաբերությունների կարգավորումն ու կարծում, որ կողմերը պետք է հավատարիմ մնան գործընթացին' առանց նախապայմանների առաջադրման:

«Շարունակելով փակ պահել Հայաստանի հետ սահմանը' Թուրքիան խոչընդոտում է ՀՀ-ԵՄ երկկողմ հարաբերությունների զարգացումը և տրանսպորտային ուղիների արդյունավետ շահագործումը: Պարադոքսալ է, որ Թուրքիան, որպես մի երկիր, որ ցանկություն ունի անդամակցել Եվրամիությանը, փակել է սահմանը հարևան պետության հետ, և սա այն դեպքում, երբ ԵՄ տարածքում ազատ տեղաշարժը հիմնարար սկզբունք է: Պարոն Տրայանը խոսեց առանց նախապայմանների հարաբերություններ հաստատելու մասին, բայց բոլորն էլ գիտեն, և դա հայտնի է, որ նախապայմանները առաջ է քաշել Թուրքիան»,- ասաց Կարեն Նազարյանը: Անդրադառնալով Լեռնային Ղարաբաղի հակամարտության կարգավորման հարցին' Նազարյանն ասաց, որ Հայաստանը բարձր է գնահատում Հերբերտ Սալդերի նշանակումը որպես Հարավային Կովկասի հարցերով ԵՄ հատուկ ներկայացուցիչ: «Հայաստանը բարձր է գնահատում ԵՄ-ի կողմից տաբեր առիթներով ԵԱՀԿ Մինսկի խմբի ջանքերին ցուցաբերած և ոչ երկիմաստ աջակցությունը, որոնք հիմնված են խաղաղ կարգավորմանը: Սա շատ կարևոր հանգամանք է»,- ասաց ՀՀ ԱԳ փոխնախարարը: