ՀՀ տրանսպորտի և կապի նախարարությունը պարզաբանում է

Գյումրի քաղաքի «Գալա» հեռուստաընկերության եթերում, ինչպես նաև հեռուստաընկերության կայքում 2015թ. փետրվարի 24-ին «Լենինականցին չոքող չէ իշխանության դեմ» վերնագրով ռեպորտաժում տեղ են գտել մի շարք անճշտություններ, ինչի արդյունքում հանրությանը սխալ տեղեկատվություն է մատուցվել։

Մասնավորապես նշվում է, որ Գյումրի քաղաքում հաշվառված տրանսպորտային միջոցներով ֆիզիկական անձանց կողմից մարդատար-տաքսի մեկ ավտոմոբիլով ուղևորափոխադրումներ կազմակերպելու համար գանձվում է պետական տուրք' ամսական 12 հազար դրամի չափով:

Մինչդեռ 2015թ. հունվարի 6-ից գործող մարդատար-տաքսի ավոտոմոբիլներով ուղևորափոխադրումների կազմակերպումը կանոնակարգող «Լիցենզավորման մասին» ՀՀ նոր օրենքով սահմանվել է պետական տուրքի վճարումների տարբերակված մոտեցում, համաձայն որի՝ 12 հազար դրամ ամսական տուրքի չափը վերաբերում է միայն Երևան քաղաքում տաքսի ծառայություններ մատուցող ֆիզիկական անձանց: Իսկ ՀՀ այլ քաղաքներում, այդ թվում նաև Գյումրիում, սահմանված են տուրքի հետևյալ չափերը.

• ամսական՝ բազային տուրքի ութապատիկի չափով (8000 դրամ),

• եռամսյակային՝ բազային տուրքի քսաներեքապատիկի չափով (23000 դրամ),

• տարեկան՝ բազային տուրքի ութսունապատիկի չափով (80000 դրամ):

Ինչ վերաբերում է այն սխալ պնդմանը, թե նոր օրենքով պարտադրվում է, որ «վարորդները հանրապետության ամենահեռավոր մարզերից պետք է հասնեն Երևան հաշվիչները ստուգաչափելու», ապա տեղեկացնում ենք, որ Գյումրի քաղաքի Շիրակացու փողոցի 68 հասցեում գործում է «Չափագիտության ազգային ինստիտուտ» ՓԲԸ-ի մասնաճյուղը, որտեղ կարելի է կատարել հաշվիչների ստուգաչափում:

Ընկերության մասնաճյուղերը գործում են նաև Վանաձոր, Կապան և Գավառ քաղաքներում: Հաշվիչների ստուգաչափման արժեքը 2400 դրամ է (ներառյալ ԱԱՀ):
Հավելենք, որ «Չափագիտության ազգային ինստիտուտ» ՓԲԸ-ն պատրաստ է մասնաճյուղեր բացել նաև այլ մարզկենտրոններում՝ ըստ անհրաժեշտության:

Ակնկալում ենք «Գալա» հեռուստաընկերության հետ արդյունավետ համագործակցություն և ՀՀ տրանսպորտի և կապի նախարարության գործունեությանը վերաբերող թեմաների համակողմանի լուսաբանում:

ՀՀ տրանսպորտի և կապի նախարարության
լրատվական ծառայություն