Կառավարությունը փոխհատուցում է ադրբեջանական գնդակոծությունից տուժած բնակիչների վնասները

Հայաստանի Հանրապետության կառավարությունը պահուստային ֆոնդից Տավուշի մարզպետարանին կհատկացնի 6 մլն 337 հազար դրամի պետական աջակցություն՝ 2015 թվականի հունվարի 5-12-ը հակառակորդի գնդակոծություններից առաջացած մարզի սահմանամերձ համայնքների բնակիչների տներին հասցված վնասները փոխհատուցելու նպատակով: «Արմենպրես»-ի հաղորդմամբ' կառավարության նիստում վարչապետ Հովիկ Աբրահամյանը նշեց, որ ընդունված որոշմամբ վերականգնվում է սահմանամերձ հինգ համայնքների գույքի կորուստը: «Սահմանամերձ համայնքների բնակիչների խնդիրները շարունակելու են գտնվել ՀՀ կառավարության ուշադրության կենտրոնում»,- ասաց վարչապետը:

2015 թվականի հունվարի 11-ի լույս 12-ի գիշերը ՀՀ Տավուշի մարզի տարածաշրջանում տեղի ունեցած գնդակոծությունների հետևանքով առաջացած վնասները գնահատելու նպատակով ՀՀ վարչապետի հանձնարարությամբ ՀՀ տարածքային կառավարման և արտակարգ իրավիճակների նախարարի հրամանով ստեղծվել էր աշխատանքային խումբ: Ուսումնասիրության արդյունքում պարզվել է, որ, ընդհանուր առմամբ, վնասվել է 6 համայնքի 134 բնակչի գույք' 6 մլն 337 հազար դրամ արժեքով: Մասնավորապես, Բերքաբեր համայնքում գնդակոծությունների հետևանքով տուժել է 66 քաղաքացի, վնասի ընդհանուր չափը կազմում է 2 մլն 668 հազար դրամ: Բարեկամավան համայնքում տուժել է 28 քաղաքացի, վնասի ընդհանուր չափը կազմում է 1 մլն 601 հազար դրամ, Չինարիում' 4 քաղաքացի, վնասի ընդհանուր չափը կազմում է 88 հազար դրամ, Կոթիում' 31 քաղաքացի, վնասի չափը կազմում է 1 մլն 96 հազար դրամ, Բաղանիսում' 2 քաղաքացի, վնասի ընդհանուր չափը կազմում է 105 հազար: Պառավաքար, Կոթի և Բերքաբեր համայնքներում հունվարի 5-12-ն ընկած ժամանակահատվածում վնասվել է 3 մեքենա, վնասի ընդհանուր չափը կազմում է 778 հազար դրամ:

Տավուշի մարզի Ադրբեջանի հետ սահմանակից համայնքներում հունվարի 5-12-ն ընկած ժամանակահատվածում տեղի ունեցած գնդակոծությունների հետևանքով առաջացած վնասները գնահատելու նպատակով աշխատանքային խումբը հիմք է ընդունել Տավուշի մարզպետի պատվերով «Գեոպրոեկտ» ՍՊԸ-ի կողմից իրականացված մարզի Բերքաբեր, Բաղանիս, Բարեկամավան, Կոթի, Չինարի և Պառավաքար համայնքների գնդակոծությունների հետևանքով վնասված գույքի շուկայական արժեքի գնահատման հաշվետվությունը»,- նշված է հիմնավորման մեջ: