Մարտի 27-ին Ռուսաստանի թատրոնները տոմսերը կառաջարկեն 90-տոկոսանոց զեղչով

Մարտի 27-ին նշվող Թատրոնի միջազգային օրը Ռուսաստանի մի քանի թատրոններում տոմսերը կվաճառվեն մինչև 90-տոկոս զեղչով:

Ինչպես հաղորդվում Է ակցիայի կայքում, զեղչով տոմսեր հնարավոր կլինի գնել Պետերբուրգի, Մոսկվայի, Եկատերինբուրգի, Նիժնի Նովգորովի, Դոնի Ռոստովի, Կրասնոդարի, Մագնիտոգորսկի, Տագանռոգի և Վորոնեժի մի քանի թատրոններում, տեղեկացնում Է «Արմենպրես»-ը:

Մոսկովյան թատրոններից ակցիային մասնակցում են «Սատիրիկոն»ը, «Et Cetera»-ը, «Տեատրալնոյե դելո»-ն, «Բալետ Մոսկվա» թատրոնը և Մոսկվայի Ջիգարխանյանի դրամատիկական թատրոնը:

Ինչպես նշում Է «Ինտերֆաքս»-ը, ակցիայի մասնակիցների շրջանում առավել մեծ թիվ են կազմում պետերբուրգյան թատրոնները: Այսպես, ցուցակում ներկայացված են Դրամատիկական մեծ թատրոնը, Լենսովետի թատրոնը, Հեքիաթի թատրոնը, «Բուֆֆ»-ը, «Բաց բեմ» և «Պետերբուրգի թատրոն» նախագծերը, «Սանկտ Պետերբուրգ Օպերա»-ն, «Էրարտա»-ն:

Հաղորդվում Է, որ թատրոնների ցուցակը կընդլայնվի:

Բացի այդ, 2015 թվականի մարտի 28-29-ին Մոսկվայի մշակույթի դեպարտամենտն անցկացնելու Է «Ամբողջ ընտանիքով՝ թատրոն» հերթական ակցիան, որի ընթացքում երեխաները և ծնողները կկարողանան անվճար այցելել դեպարտամենտի ենթակայության տակ գտնվող մոսկովյան թատրոններ: Տոմսերը տարածվելու են Մոսկվայի կրթության դեպարտամենտի միջոցով: