ԱՄՆ-ն աստղակերպի վրա աստղանավորդների կիջեցնի 2025 թվականին

ԱՄՆ-ի NASA տիեզերական գերատեսչությունը մտադիր է 2025 թվականին իրականացնել ամերիկացի աստղանավորդների վայրէջքը աստղակերպի՝ ավելի ճիշտ դրա այն բեկորի վրա, որը կհասցվի լուսնաշուրջ ուղեծիր: Այդ մասին, ինչպես տեղեկացնում է «Արմենպրես»-ը, հայտնել է NASA-ի տնօրենի օգնական Ռոբերտ Լայտֆուտը: Նրա խոսքով՝ այդ առաքելության համար կօգտագործվի «Օրիոն» նոր օդաչուավոր տիեզերանավը, որը 2014 թվականին կատարել է իր առաջին փորձնական թռիչքը:

NASA-ն որոշել է այն սցենարը, որով պլանավորվում է իրականացնել «աստղակերպի ծրագիրը», ասել է Լայտֆուտը:

Ինչպես նշում է ՏԱՍՍ-ը, ամերիկացի մասնագետները հրաժարվել են մի ամբողջ աստղակերպ երկրաշուրջ ուղեծիր դուրս բերելու գաղափարից և որոշել են այնտեղ քարշ տալ դրա մակերևույթին ընկած բեկոր կամ վիթխարի գլաքար: Դրա համար 2020 թվականի դեկտեմբերին ավտոմատ ապարատ կուղարկվի դեպի այն աստղակերպ, որն ընտրել են փորձագետները: Ապարատը պետք է հատուկ թակարդի մեջ վերցնի երկնային մարմնի բեկորը և այն հասցնի Երկրի բնական արբանյակի մոտ: Դրանից հետո հինգ տարի անց դեպի աստղակերպ կուղևորվի աստղանավորդներով «Օրիոնը»:

Ծրագրի արժեքը գնահատվում է 1,25 միլիարդ դոլար: NASA-ն հուսով է, որ այն կարևոր փուլ կդառնա դեպի Մարս մարդու առաջին ճանապարհորդության նախապատրաստման բնագավառում, որը կիրականացվի 2030-ական թվականներին: