ԲՀԿ-ում ակնկալում են, որ ԱԺ կներկայացվի սահմանադրական բարեփոխումների վերաբերյալ երկու նախագիծ

«Բարգավաճ Հայաստան» կուսակցությունը սահմանադրական բարեփոխումների վերաբերյալ դիրքորոշումը չի փոխի, եթե կառավարման խորհրդարանական համակարգին անցնելու նախագծի հետ խորհրդարանի քննարկմանը չներկայացվի նաև երկրորդ նախագիծը, որով կպահպանվի կիսանախագահական համակարգը:

Այս մասին մարտի 31-ին լրագրողների հետ հանդիպմանն ասաց ԱԺ ԲՀԿ խմբակցության պատգամավոր Միքայել Մելքումյանը: «Դուք գիտեք, որ մենք հանդիպել ենք հանրապետութփյան Նախագահի հետ, քննարկել ենք սահմանադրական բարեփոխումների հարցը, որից հետո եղավ մեր պաշտոնական հայտարարությունը, որ մենք այս հարցում մեր դիրքորոշումը չենք փոխել: Մեզ առաջին հերթին մտահոգում է այն, թե խորհրդարանական համակարգին անցնելու դեպքում ո՞վ է լինելու Հայաստանի ներքին և արտաքին անվտանգության պատասխանատուն և երաշխավորը: Սա ես համարում եմ ամենաանկյունաքարային հարցերից մեկն ընտրական օրենսգրքում կատարվելիք փոփոխությունների հետ»,- «Արմենպրես»-ի հաղորդմամբ՝ նշեց Մելքումյանը:

Նա չբացառեց, որ սահմանադրական բարեփոխումների վերաբերյալ խորհրդարանի քննարկմանը կներկայացվի երկու նախագիծ, որոնցից մեկը կլինի կառավարման խորհրդարանական մոդելին անցում կատարելու, մյուսը՝ կիսանախագահական համակարգը պահելու վերաբերյալ: «Եթե չլինի երկրորդ նախագիծը և Ազգային ժողովի քննարկմանը ներկայացվի միայն խորհրդարանական մոդելին անցնելու տարբերակը, այդ դեպքում մենք չենք փոխի մեր դիրքորոշումը սահմանադրական բարեփոխումների վերաբերյալ և կքննարկենք հետագա գործընթացներին մեր մասնակցել-չմասնակցելու հարցը»,- ընդգծեց Մելքումյանը:

Մելքումյանը նաև նշեց, որ ԲՀԿ-ն պահպանել է իր ծրագրային դրույթները, իսկ նախկին դիրքորոշումները փոփոխության չեն ենթարկվել: Նա նկատեց, որ թեև վերջին ներքաղաքական զարգացումներից հետո իրավիճակը փոխվել է, սակայն ԲՀԿ-ն շարունակում է մնալ Հայաստանի երկրորդ քաղաքական ուժը և առաջ շարժվելու համար լավ հնարավորություններ ունի: