Կառլա Լագերֆելդի կատուն մեկ տարում 3 մլն եվրո է վաստակել

Այլ 1 Ապրիլ, 2015 22:39

ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Մոդելագործ Կառլա Լագերֆելդի Շուպետ մականունով կատուն 2014 թվականին 3 մլն եվրո է վաստակել: Այդ մասին, ինչպես տեղեկացնում է «Արմենպրես»-ը, դիզայներն ինքը պատմել է The New York Magazine-ին տված հարցազրույցում:

Անցյալ տարի Շուպետը մասնակցել է երկու գովազդային արշավի՝ Opel Corsa ավտոմեքենայի և կոսմետիկայի ճապոնական Shu Uemura ապրանքանիշի:

Լագերֆելդի խոսքով՝ ինքն իր կատվին թույլ չի տվել նկարահանվել սննդամթերքի և բանջարեղենի գովազդում: «Նա բացառիկ էակ է: Մարդու նման է: Բայց լավ է, որ նա լռում է»,-հայտարարել է դիզայները: Լագերֆելդը նաև հավելել է, որ իր կատուն տանել չի կարողանում մյուս կենդանիներին ու երեխաներին: Դիզայները նշել է, որ նա աշխարհի կենտրոնն է, իսկ նրա խաղերի ու շարժումների մեջ անմոռանալի ինչ-որ բան կա:

2014 թվականի հուլիսին լույս է տեսել «Շուպետ. բարձր թռիչքի մոդայիկ կատվի անձնական կյանքը» գիրքը: Աշխարհում ամենանշանավոր կատուներից մեկի կենսագրությունը գրել են Պատրիկ Մորյեն և Ժան Քրիստոֆ Նապյան:

Բիրմայական Շուպետ կատուն Լագերֆելդի մոտ է հայտնվել 2012 թվականի վերջին, երբ նրա ընկերներից մեկը՝ մանեկեն Բատիստ Ջաբիկոնին, խնդրել էր Ծննդյան տոների արձակուրդների ընթացքում պահել իր կենդանուն: Մի քանի օրում դիզայները սովորել է նրան և Ջաբիկոնիին խնդրել է կատուն տալ իրեն:

Շուպետն իր ակաունտն ունի Twitter-ում. դրան բաժանորդագրվել են շուրջ 47 հազար օգտատերեր: Լագերֆելդի կատուն կանոնավոր կերպով տեղ է զբաղեցնում ցանցի առավել մեծ ժողովրդականություն վայելող կենդանիների վարկանիշներում: Նրա տարիքը, նորաձևության աշխարհի ավանդույթների համաձայն, գաղտնի է պահվում (ենթադրվում է, որ կատուն այժմ չորսից մինչև յոթ տարեկան է):