Արծվիկ Մինասյանը կարևորում է կոռուպցիայի դեմ պայքարի համար միջավայրի ձևավորումը

Կոռուպցիայի դեմ պայքարի լավագույն միջոցը համապատասխան միջավայրի ձևավորումն է: Ապրիլի 1-ին կոռուպցիայի դեմ պայքարի վերաբերյալ կազմակերպված քննարկման ընթացքում նման կարծիք հայտնեց ԱԺ ՀՅԴ խմբակցության պատգամավոր Արծվիկ Մինասյանը: «Հարկավոր է ստեղծել այնպիսի միջավայր, որում մարդը կհասկանա' կոռուպցիայի դիմելուց իրեն ավելի շատ է վնասելու, քան եթե գործի օրենքի շրջանակներում: Սա շատ կարևոր է կոռուպցիայի դեմ պայքարի համար, և նման միջավայր ստեղծելու համար անհրաժեշտ է կոնկրետ քայլերի գնալ, ոչ թե բավարարվել խոսելով ու կոռուպցիան որպես հասարակության թշնամի առաջարկելով»,- նշեց Մինասյանը:

Պատգամավորը կոռուպցիայի դեմ պայքարի կարևոր պայման է համարում նաև բոլոր ոլորտներում պատշաճ վարձատրության ապահովումը: «Կոռուպցիայի դեմ պայքարում կարևոր նշանակություն ունի նաև հստակ պատասխանատվության մեխանիզմը, առանց որի այս հարցում որևէ հաջողության հասնելու հեռանկարներ չեն լինելու»,- ընդգծեց Մինասյանը:

Նա նաև հայտնեց, որ ՀՅԴ-ն կոռուպցիայի դեմ պայքարի համար 12 էջից բաղկացած առաջարկների փաթեթ է պատրաստել, որը ներկայացվել է թե՛ նախկին, թե՛ ներկա կառավարությանը, սակայն մինչ օրս որևէ արձագանք չկա:

ՀՀ կառավարության որոշմամբ' ՀՀ վարչապետ Հովիկ Աբրահամյանի գլխավորությամբ ստեղծվել է կոռուպցիայի դեմ պայքարի խորհուրդ, որի նպատակը կոռուպցիոն ռազմավարության, դրա հիման վրա մշակված տարբեր ծրագրերի, միջոցառումների քննարկումն ու անցկացումն է: Խորհրդի կազմում ընդգրկվելու են նաև ընդդիմադիր խմբակցությունների պատգամավորներ, ինչի համար կառավարությունը նամակով դիմել է ԱԺ նախագահին: