Ապրիլի 6-ի աշխատանքային օրը տեղափոխվեց շաբաթ

Հայաստան 2 Ապրիլ, 2015 12:45

ՀՀ կառավարության որոշմամբ՝ 2015 թվականի ապրիլի 6-ի աշխատանքային օրը տեղափոխվեց շաբաթ' ապրիլի 11-ին: Ինչպես հաղորդում է «Արմենպրես»-ը, ՀՀ կառավարության աշխատակազմի ղեկավար-նախարար Դավիթ Հարությունյանը նշեց, որ կարող է հարց ծագել, թե ինչու հինգ տաղավար տոների հետ կապված միանգամից որոշում չի կայացվում: Հարությունյանի խոսքով՝ այս հարցի հետ կապված հասարակության մոտ կան բացարձակապես տարբեր կարծիքներ, մի մասը կողմ է մեռելոցների օրերի ոչ աշխատանքային սահմանմանը, կան կարծիքներ նաև, որ նման որոշումները խաթարում են տնտեսական ակտիվությունը, հատկապես խոշոր կազմակերպություններում, որոնք համագործակցում են արտերկրի ընկերությունների հետ:

«Հարցն իսկապես պահանջում է ավելի լուրջ ուսումնասիրություն, վարչապետի հանձնարարությամբ՝ պետք է Հայ Առաքելական Սուրբ Եկեղեցու հետ ուսումնասիրենք խնդիրը, ի հայտ բերելու, թե ինչ պատկեր է տիրում հասարակության շրջանում»,- ասաց նախարարը:

Իր հերթին, ՀՀ վարչապետ Հովիկ Աբրահամյանը հիշեցրեց, որ հունվարի մեկից Հայաստանն անդամակցում է Եվրասիական տնտեսական միությանը, որի անդամ երկրներում շաբաթ օրերը ոչ աշխատանքային են: Վարչապետը նշեց, որ պետք է որոշումը նպաստի արդյունավետ աշխատանք կազմակերպելուն, իսկ աշխատանքային օրերի փոփոխությունը տնտեսական լարվածության ներկայիս պայմաններում կարող է խաթարել աշխատանքային պրոցեսը: Վարչապետը նշեց, որ չի կարծում, թե կլինի որևէ պաշտոնյա, ով թույլ չի տա իր ենթականերին այցելել գերեզման: Ամեն դեպքում վարչապետն անհրաժեշտ համարեց շարունակել քննարկումները:

Կառավարության նիստին ներկա էր նաև Հայ Առաքելական եկեղեցու ներկայացուցիչ Արշակ սրբազանը, ով իր ելույթում, ընդհանուր առմամբ, կողմն արտահայտվեց մեռելոցների օրերը ոչ աշխատանքային թողնելուն:

«Աշխատանքային օրը տեղափոխելու մասին» ՀՀ կառավարության որոշման նախագծի ընդունումը նպատակ ունի հնարավորություն ընձեռնել քաղաքացիներին Տաղավար' Սբ. Հարության տոնի' ապրիլի 5-ի հաջորդող հիշատակի օրն այցելելու իրենց ննջեցյալների գերեզմանները: ՀՀ կառավարության որոշման նախագծի ընդունումը բխում է «Հայաստանի Հանրապետության տոների և հիշատակի օրերի մասին» Հայաստանի Հանրապետության օրենքի 19-րդ հոդվածն ու «Խղճի ազատության և կրոնական կազմակերպությունների մասին» Հայաստանի Հանրապետության օրենքի 17-րդ հոդվածից: