«Orange»-ի ամենաժողովրդական նախագծերից մեկը` «Դեպի Կանն» մրցույթն սկսված է

«Orange» ընկերության նախաձեռնությամբ և աջակցությամբ ապրիլ ամսին իրականացվելու են Հայոց ցեղասպանության 100-րդ տարելիցին նվիրված մի շարք միջոցառումներ:

««Orange»-ը Հայաստանի քաղաքացի է, որն ունի ֆրանսիական արմատներ: Այդ իսկ պատճառով մենք որոշել ենք մեր մասնակցությունն ունենալ Հայոց ցեղասպանության 100-րդ տարելիցին նվիրված մի շարք միջոցառումներին, այդ թվում նաև՝ այն նախաձեռնություններին, որոնք արտահայտում են Ֆրանսիայի ժողովրդի զորակցությունը հայ ժողովրդին: Մենք մեր պարտքն ենք համարում աջակցել այս կարևոր նախաձեռնություններին՝ թույլ տալով մեր բաժանորդներին արտահայտել իրենց զորակցությունը և անմասն չմնալ ինչպես Հայաստանում, այնպես էլ արտերկրում կազմակերպվող միջոցառումներին, որոնք նվիրված են Հայոց ցեղասպանության 100-րդ տարելիցին»,- այսօր լրագրողների հետ հանդիպմանն ասաց «Օրանժ Արմենիա» ընկերության գլխավոր տնօրեն Ֆրանսիս Ժելիբտերը:

Ինչպես նախորդ 6 տարիներին, այս տարի ևս «Orange»-ը հնարավորություն է տալիս իր բաժանորդներին մասնակցելու Կաննի կինոփառատոնին: Կարմիր գորգ, աշխարհահռչակ կինոաստղեր, լավագույն ռեժիսորների լավագույն ֆիլմեր. 2 անմոռանալի օր է խոստանում ընկերությունը «Դեպի Կանն» մրցույթի հաղթողին: Այս տարի մրցույթը կանցնի «100 տարվա վերածնունդ» խորագրի ներքո.

Մրցույթին մասնակցելու համար անհրաժեշտ է պատրաստել կարճ տեսանյութ` «100 տարվա վերածնունդ» թեմայով: 

Տեսանյութն անհրաժեշտ է պատրաստել հայերենով, իսկ տևողությունը չպետք է գերազանցի 1 րոպեն, սակայն բովանդակությունն ու ձևաչափն ազատ են:

«Այս տարի շատ կարևոր ուղենիշ է հայ ժողովրդի համար: 100 տարի առաջ տեղի ունեցածը ողբերգություն էր, բայց այն չկարողացավ կոտրել հայ ժողովրդի վերընթաց ուղին և ապրելու անկեղծ ցանկությունը: Այս 100 տարվա ընթացքում հայ ժողովուրդն ստեղծել է պետականություն և ձեռքբերումներ ունի թե՛ Հայաստանում, թե՛ սփյուռքում: Ահա սա է խորհուրդը, որ մենք որոշեցինք այս տարվա «Դեպի Կանն» մրցույթը նվիրել Հայոց ցեղասպանության 100 ամյակին՝ ակնկալելով, որ մեր բաժանորդերը պատրաստ են նկարահանել փոքրիկ նյութեր այս թեմայի շուրջ: Դրանք կարող են լինել փոքրիկ պատմություններ իրենց իսկ ընտանիքի ճակատագրի հետ կապված: Այնպես որ, մենք չենք սահմանափակում ստեղծագործ միտքը»,- ասում է «Օրանժ Արմենիա» բրենդի և հաղորդակցության գծով տնօրեն Արամ Մկրտչյանը և հավելում, որ իրենք մեծ տեղ են տալու գեղարվեստորեն և հետաքրքիր ձևով ներկայացրած ֆիլմերին:

Մրցույթի մասին բոլոր մանրամասներին կարող եք ծանոթանալ՝ անցնելով հետևյալ հղումով.