ՀԱՊԿ-ի ԱԳ նախարարները հայտարարել են Երկրորդ աշխարհամարտի արդյունքների վերանայման անթույլատրելիության մասին

Հավաքական անվտանգության պայմանագրի կազմակերպության անդամ պետությունների արտաքին գործերի նախարարները ապրիլի 2-ին Դուշնաբերում հայտարարություն են ընդունել Հայրենական մեծ պատերազմում Հաղթանակի օրվա մոտեցող տոնակատարության կապակցությամբ, փաստաթղթում խոսվում Է դրա արդյունքների խեղաթյուրման և վերանայման անթույլատրելիության, ինչպես նաև նացիզմի հերոսացման վտանգավորության մասին, տեղեկացնում Է «Արմենպրես»-ը՝ հղում անելով ՌԻԱ Նովոստին:

«ՀԱՊԿ-ի անդամ պետությունները կտրականապես չեն ընդունում և վճռականորեն դատապարտում են պատմության վերափոխման, Երկրորդ համաշխարհային պատերազմի արդյունքների վերանայման նպատակով գործադրվող ջանքերը»,-ասված Է հայտարարության մեջ:

Նախարարները նշել են, որ Հաղթանակին հաջողվել Է հասնել միայն բազմաթիվ ժողովուրդների ջանքերի միավորման շնորհիվ: Ուստի և անթույլատրելի են համարում նացիզմը և ռազմաշունչ ազգայնամոլությունը հերոսացնելու փորձերը:

«Գտնում ենք, որ նացիզմին հաղթած երկրները պետք Է ըստ ամենայնի խոչընդոտեն նեոֆաշիզմի, շովինիզմի և այլատյացության այլ ձևերի դրսևորմանը, ինչպես նաև արմատական նացիոնալիզմի տարածմանը, այդ թվում՝ երիտասարդության շրջանում»,-ընդգծվում Է փաստաթղթում:

Նախարարները կոչ են արել համաշխարհային հանրակցությանը՝ հարգել և պաշտպանել հետպատերազմյան միջազգային-իրավական փաստաթղթերի սկզբունքները, որոնք նպատակամղված են պատերազմների սանձազերծման, պատերազմական հանցագործությունների, ցեղասպանության ակտերի ու կտտանքների կանխմանը: