Հարյուրավոր իրանցիներ են դուրս եկել փողոցներ՝ տոնելու Լոզանի բանակցությունների հաջողությունը

Ապրիլի լույս 3-ի գիշերը հարյուրավոր իրանցիներ են դուրս եկել Թեհրանի փողոցներ՝ տոնելու երկրի միջուկային ծրագրի շուրջ Լոզանի բանակցություններում ձեռք բերված հաջողությունը, տեղեկացնում է «Արմենպրես»-ը՝ հղում անելով «Ֆրանսպրես» գործակալությանը:

Իրանի մայրաքաղաքի ամենաերկար փողոցը՝ Վալի Ասրը, լիքն էր ավտոմեքենաների շարասյուներով, որոնց վարորդները ազդանշան էին տալիս՝ ողջունելով շրջանակային համաձայնագրի կնքումը, որի վերջնական տարբերակը պետք է պատրաստվի մինչև հունիսի 30-ը:

Ինչպես նշում է ՌԻԱ Նովոստին, տեղի բնակիչները սոցիալական ցանցերում լուսանկարներ ու տեսագրություններ են հրապարակում Թեհրանի փողոցներից, որոնցում երևում է, որ մարդիկ փողոցներ են դուրս եկել հանրապետության նախագահ Հասան Ռոուհանիի դիմանկարներով: Սոցցանցերում նաև հայտնվել են այն իրանցիների բազմաթիվ լուսանկարներ, ովքեր գոհ են միջուկային բանակցությունների արդյունքների վերաբերյալ ԱՄՆ-ի նախագահ Բարաք Օբամայի ելույթի հեռարձակումից:

Իրանի միջուկային ծրագրի շուրջ մարտի 26-ին սկսված բանակցությունների փուլն ապրիլի 2-ին նշանավորվել է երկար սպասված համաձայնության ձեռքբերմամբ: Շվեյցարական Լոզանում Իրանը և «վեցյակը» (ՄԱԿ-ի Անվտանգության խորհրդի հինգ մշտական անդամները և Գերմանիան) կարողացան շփման եզրեր գտնել և հիմք ստեղծել համապարփակ համաձայնագրի տեքստի վրա եզրափակիչ աշխատանքի համար:

«Մենք լի ենք վճռականությամբ շարունակել մեր ջանքերը և մտադիր ենք աշխատանքն ավարտել մինչև հունիսի 30-ը»,- մամուլի համար արված ամփոփիչ հայտարարության մեջ ընդգծել է Եվրամիության արտաքին գործերի և անվտանգության քաղաքականության գերագույն ներկայացուցիչ Ֆեդերիկա Մոգերինին: «Այսօր մենք վճռորոշ քայլ կատարեցինք դեպի առաջ,- ասել է Մոգերինին: Մենք հասանք ապագա համապարփակ համաձայնագրի հանգուցային պարամետրերի համաձայնեցմանը»:

Նրա խոսքով՝ «առաջիկա շաբաթներին և ամիսներին» կողմերի ներկայացուցիչները քաղաքական և փորձագիտական մակարդակով կաշխատեն «համապարփակ համաձայնագրի տեքստը կազմելու վրա, որը կներառի տեխնիկական բոլոր մանրամասները»:

Լուսանկարը' AFP