ԱՊՀ-ի ԱԳ նախարարները ողջունել են Իրանի միջուկային ծրագրի շուրջ բանակցությունների արդյունքները

ԱՊՀ-ի երկրների արտաքին գործերի նախարարների խորհուրդը ողջունել է Իրանի միջուկային ծրագրի շուրջ Լոզանում կայացած բանակցությունների արդյունքները: Այդ մասին, ինչպես տեղեկացնում է «Արմենպրես»-ը, հայտարարվել է Խորհրդի՝ ապրիլի 3-ին Բիշքեկում ընթացող նիստի ժամանակ:

«Ավարտվել է իրանական միջուկային ծրագրի շուրջ բանակցությունների կարևոր փուլը: Մենք ամբողջությամբ պաշտպանում ենք այդ արդյունքները»,- ասել է ԱԳ նախարարների խորհրդի նախգահ, Ղազախստանի արտաքին քաղաքական գերատեսչության ղեկավար Եռլան Իդրիսովը՝ բացելով Խորհրդի ընդլայնված նիստը:

Ըստ ՌԻԱ Նովոստիի, Իդրիսովն ընդգծել է իրանական միջուկային ծրագրի լուծման կարևորությունը Կենտրոնասիական տարածաշրջանի և ԱՊՀ-ի տարածաշրջանի համար: Նա նաև նշել է, որ «բանակցությունների ընթացքում բազմաթիվ հանգուցալուծումներ գտնվել են շնորհիվ Ռուսաստանի պատվիրակության կրեատիվության»:

Իրանի միջուկային ծրագրի շուրջ մարտի 26-ին սկսված բանակցությունների փուլն ապրիլի 2-ին նշանավորվել է երկար սպասված համաձայնության ձեռքբերմամբ: Շվեյցարական Լոզանում Իրանը և «վեցյակը» (ՄԱԿ-ի Անվտանգության խորհրդի հինգ մշտական անդամները և Գերմանիան) կարողացան շփման եզրեր գտնել և հիմք ստեղծել համապարփակ համաձայնագրի տեքստի վրա եզրափակիչ աշխատանքի համար:

«Մենք լի ենք վճռականությամբ շարունակել մեր ջանքերը և մտադիր ենք աշխատանքն ավարտել մինչև հունիսի 30-ը»,- մամուլի համար արված ամփոփիչ հայտարարության մեջ ընդգծել է Եվրամիության արտաքին գործերի և անվտանգության քաղաքականության գերագույն ներկայացուցիչ Ֆեդերիկա Մոգերինին: «Այսօր մենք վճռորոշ քայլ կատարեցինք դեպի առաջ,- ասել է Մոգերինին: Մենք հասանք ապագա համապարփակ համաձայնագրի հանգուցային պարամետրերի համաձայնեցմանը»:

Նրա խոսքով՝ «առաջիկա շաբաթներին և ամիսներին» կողմերի ներկայացուցիչները քաղաքական և փորձագիտական մակարդակով կաշխատեն «համապարփակ համաձայնագրի տեքստը կազմելու վրա, որը կներառի տեխնիկական բոլոր մանրամասները»: