Ամերիկացի նավաստին փրկվել է 66 օր բաց ծովում մնալուց հետո

Բեռնարկղեր փոխադրող գերմանական նավը փրկել է ամերիկացի Լուիս Ջորդանին, որն Ատլանտյան օվկիանոսում 66 օր հոսընթացով շարժվել է անսարք նավակով, հաղորդում է «Արմենպրես»-ը՝ հղում անելով CNN-ին:

Հունվարի վերջին 37-ամյա Ջորդանն իր10-մետրանոց զբոսանավով ձկնորսության է ուղևորվել Հարավային Կարոլինայի ափի մոտ: Այն բանից հետո, երբ տաղամարդը չի վերադարձել տուն, հայտարարվել է անհայտ կորած, Ջորդանի որոնումները արդյունքներ չեն տվել:

Ապրիլի 2-ին Հատերասի հրվանդանից 360 կիլոմետր հեռավորության վրա Ջորդանին նկատել է Houston Express նավի անձնակազմը: Փրկվածին ուղղաթիռով տեղափոխել են Նորֆոլկի հիվանդանոց: Տղամարդու վիճակը բժիշկները գնահատել են բավարար, նրա մոտ հայտնաբերվել է սոսկ ուսի վնասվածք:

Ջորդանն առաջին բանը, որ արել է, հեռախոսով կապվել է իր հոր՝ Ֆրենկի հետ՝ հայտնելու, որ ինքը ողջ է: Ինչպես հայտնել են Առափնյա պահպանության ուժերի ներկայացուցիչները, ձկնորսը պատմել է, որ ողջ է մնացել այն բանի շնորհիվ, որ կերել է հում ձուկ և խմել անձրևաջուր:

Ֆրենկ Ջորդանը հայտարարել է, որ այդ ամբողջ ժամանակ հավատացել է, որ իր որդին ողջ է: «Նա շատ ամրակազմ է և ուժեղ է ոչ միայն ֆիզիկապես, այլև հոգեպես: Եվ նա հեռախոսով ինձ պատմեց, որ աղոթում էր այդ ամբողջ ժամանակ, ինչն, իմ կարծիքով, շատ օգնել է նրան»,- պատմել է փրկվածի հայրը: