Ադրբեջանում անգամ երեխան գիտի պաշտոնների վաճառքի մասին. կուսակցապետ

Ադրբեջանի Դասական ժողովրդական ճակատ կուսակցության առաջնորդ Միրմահմուդ Միրալիօղլուն հանրության ուշադրությունը հրավիրել է երկրում բոլոր պաշտոնների վաճառվելու փաստին:

Ինչպես հաղորդում է «Արմենպրես»-ը, moderator.az-ին տված հարցազրույցում, անդրադառնալով զավակի թույլ տված հակաօրինական քայլի համար պաշտոնյա ծնողին աշխատանքից ազատելու ավանդույթի վերածվելու դեպքերին, Մ. Միրալիօղլուն հայտարարել է, որ ադրբեջանական հանրության ժողովրդավարական հատվածի նշանակալից մասը համաձայն չէ զավակների պատճառով ծնողներին պատժելու իշխանությունների գործողությունների հետ:

«Ծիծաղելին այն է, որ Ադրբեջանի իշխանությունը ժխտում է պաշտոնյաների կոռումպացված լինելն ու նարնց պաշտոնեական կամայականությունները և անգամ հայտարարում է, թե, իբր, պայքար է տանում այդ երևույթների դեմ: Սակայն, յուրաքանչյուր ոք գիտի, թե այս կամ այն գործադիր ղեկավարի, նրա տեղակալի պաշտոնի նշանակվելն ինչ արժե: Գուցե մենք չգիտենք դրա հստակ թիվը, սակայն, իմացողը գիտի, թե որ պաշտոնն ինչ արժե, և ինչպես կարելի է տիրանալ դրան: Այսօր խոսում են բազմաթիվ պաշտոնյաների զավակների ապօրինությունների մասին: Իշխանությունը զավակների արարքների համար պա շտոնյաներին պատժելը քաղաքականություն է դարձրել: Բայց փողով աշխատանքի նշանակելու ժամանակ երբեք չեն հարցնում, թե ինչով են զբաղված նրանց զավակները: Միայն հարցնում են, թե կարո՞ղ է վճարել համապատասխան գումարը: Ադրբեջանում նման կերպ պաշտոնների նշանակման մասին անգամ մանկահասակ երեխան գիտի», -ասել է ադրբեջանցի կուսակցապետը: