Լոզանի բանակցություններում բեկումը կապված է նաև Իրանի նոր քաղաքականության հետ. Շտայնմայեր

Առաջընթացը, որը ձեռք է բերվել Թեհրանի միջուկային ծրագրի շուրջ բանակցություններում, հնարավոր դարձավ, այդ թվում՝ այն փոփոխությունների շնորհիվ, որոնք տեղի են ունեցել Իրանի քաղաքականության մեջ: Ինչպես տեղեկացնում է «Արմենպրես»-ը, այս կարծիքը ԳՖՀ-ի արտաքին գործերի նախարար Ֆրանկ Վալտեր Շտայնմայերը հայտնել է ԱՌԴ հեռուստաալիքի եթերում:

Նրա գնահատմամբ՝ Իրանում ուժեղացել են այն մարդկանց դիրքերը, «ովքեր հասկանում են, որ երիտասարդ սերնդին հարկավոր է ավելին, քան երկիրը միջուկային տերության վերածելու ֆանտազիան»: Այդ քաղաքական գործիչները փորձում են երիտասարդությանը ապագայի հեռանկար տալ, ասել է Շտայնմայերը:

«Դրա համար հարկավոր են տնտեսական փոխանակում, տեխնոլոգիաներից օգտվելու հնարավորություն և, անշուշտ, պատժամիջոցներից ազատում»,- ընդգծել է ԱԳ նախարարը: Նրա կարծիքով՝ Լոզանի պայմանավորվածությունները լավ հիմք են իրանական միջուկային ծրագրի շուրջ վերջնական համաձայնություն կնքելու համար: Հիմնական կետերը, որոնց շուրջ համաձայնություն է ձեռք բերվել, նվազագույնի են հասցնում, «որքանով դա հնարավոր է», Իսլամական Հանրապետության կողմից ատոմային զենքի ստեղծման վտանգը, նշել է Շտայնմայերը:

«Մեր կողմից մենք պետք է հավաստիացնենք Իրանին, որ եթե նա պաշտպանի այդ կետերը, ապա մենք պատրաստ կլինենք չեղյալ հայտարարել տնտեսական պատժամիջոցները»,- եզրափակել է նախարարը:

Ավելի վաղ Մեծ Բրիտանիայի ԱԳ նախարար Ֆիլիպ Համոնդը հայտարարել է, որ Շվեյցարիայում ձեռք բերված համաձայնությունները հիմք են դնում Իրանի հետ հանրագումարային շատ լավ համաձայնագրի կնքման համար: Նրա կարծիքով՝ բանակցությունների մասնակիցների բռնած դիրքը հեռանկարում թույլ կտա խուսափել սպառազինությունների մրցավազքից Մերձավոր Արևելքում:

Ֆրանսիայից նրա պաշտոնակից Լորան Ֆաբիուսն արձանագրել է, որ առջևում դեռ շատ աշխատանք կա: Նրա խոսքով՝ այժմ կողմերը թևակոխել են «բանակցային գործընթացի նոր փուլ»: «Կփորձենք էլ ավելի առաջ շարժվել»,- հավելել է նախարարը:

Ռուսաստանի արտաքին գործերի փոխնախարար Սերգեյ Ռյաբկովը «կարևոր բնագիծ» է համարել Լոզանում կայացած բանակցությունների արդյունքները: Նրա խոսքով՝ համաձայնագիրը «եզակի, բարդագույն փաստաթուղթ է, որը պետք է մշակվի բոլոր մանրամասներով»: «Դրա համար կօգտագործվի մինչև հունիսի վերջն ընկած ժամանակը: Հուսով ենք, որ երկարաձգում չի պահանջվի»,- հավելել է Ռյաբկովը:

ԱՄՆ-ի նախագահ Բարաք Օբաման հատուկ հայտարարություն է արել մամուլի համար՝ նշելով, որ Վաշինգտոնն իր դաշնակիցների ու գործընկերների հետ «պատմական փոխըմբռնման է հասել Իրանի հետ»:

«Ես համոզված եմ, որ եթե այդ շրջանակային համաձայնությունը բերի վերջնական համապարփակ գործարքի, ապա այն կամրապնդի թե մեր երկրի, թե մեր դաշնակիցների, թե ամբողջ աշխարհի անվտանգությունը»,- ասել է Օբաման: Նրա խոսքով՝ Լոզանի համաձայնությունը «լավ գործարք է, գործարք, որը համապատասխանում է մեր գլխավոր նպատակներին», հաղորդել է ՏԱՍՍ-ը: