Ադրբեջանը մարտին մանաթի փոխարժեքը պահպանելու վրա 600 մլն դոլար է ծախսել

Ադրբեջանի կենտրոնական բանկը մանաթի ընթացիկ փոխրաժեքը պահպանելու համար միայն մարտին մոտ 600 մլն դոլար է ծախսել:

Այս մասին, ինչպես հաղորդում է «Արմենպրես»-ը, «Ազատություն» ռադիոկայանին տված հարցազրույցում հայտարարել է Ադրբեջանի խորհրդարանի սոցիալական քաղաքականության հանձնաժողովի անդամ Վահիդ Ահմեդովը:

Նրա խոսքով, այն փաստը, որ Կենտրոնական բանկը մեծ փողեր է ծախսում մանաթի ընթացիկ փոխրաժեքը պահպանելու համար, խոսում է այն մասին, որ ազգային արժույթի փոխրաժեքի հետագա անկման մեծ հավանականություն կա:

«Ես խոսել եմ Կենտրոնական բանկի ղեկավար Էլման Ռուստամովի հետ: Նա ինձ վստահեցրել է, որ մանաթի կտրուկ արժեզրկում չի լինի»,- ասել է պատգամավորը:

Ադրբեջանական ԶԼՄ-ների համաձայն' անցյալ աշնան վերջից մինչեւ մարտ մանաթի փոխրաժեքը պահպանելու վրա Ադրբեջանի ԿԲ-ն 5 մլրդ դոլարից ավելի ֆինանսական միջոցներ է ծախսել:

Ադրբեջանցի հայտնի տնտեսագետ Գուբադ Իբադօղլուն հայտարարել է, որ Ադրբեջանի ազգային արժույթ մանաթին նոր' ավելի մեծ արժեզրկում է սպասում:

Նա հիշեցրել է, որ նավթի համաշխարհային գների շարունակական անկման հետևանքով մանաթի փետրվարյան 34 տոկոս արժեզրկման պատճառով Ադրբեջանի պետական նավթային հիմնադրամի եկամուտները, փետրվարի 21-ի դրությամբ, արդեն 3,3 մլրդ դոլարով կրճատվել են:

Նման իրավիճակում տնտեսագետը հիմնադրամի եկամտաբերության խնդրի լուծման երկու տարբերակ է տեսնում: Առաջին տարբերակում, որը խիստ հիպոթետիկ է, ադրբեջանական նավթի միջին տարեկան գինը մեկ բարելի դիմաց չպետք է 75 դոլարից պակաս լինի:

«2015 թվականի առաջին եռամսյակն արդեն հետևում է, ադրբեջանական նավթի գինը տատանվում է 55 դոլարի շուրջ, և նավթի գնի էլ ավելի անկման միտում է զգացվում: Նման դեպքում կառավարությունը պետք է սպասի նավթի գնի մինչև 83 դոլար բարձրանալուն, որպեսզի փոխհատուցի կորուստները, ինչը խիստ անհավանական է»,- ասել է նա:

Մյուս տարբերակը ադրբեջանցի տնտեսագետը տեսնում է մանաթի 50 տոկոսով արժեզրկման մեջ՝ մինչև մեկ դոլարը 1,5 մանաթ գնի:

«Դա ավելի օպտիմալ տարբերակ է: Բնակչությունը պետք է պատրաստվի կյանքի մակարդակի երկրորդ անկման ալիքին: Այս անգամ այն պետք է նվազի ոչ թե 34 տոկոսով, ինչպես դա տեղի ունեցավ փետրվարի 21-ին, այլ 50 տոկոսով: Բանն այն է, որ եթե նավթի միջին գինը մնա 60 դոլար, ապա նավթային հիմնադրամի եկամտի դեֆիցիտը կկազմի 3,4 մլրդ դոլար: Քանի որ կառավարությունը պետբյուջեն ֆինանսավորելու այլ աղբյուրներ չունի, նրան կմնա Կենտրոնական բանկին հանձնարարել պատրաստվել տարվա երկրորդ կեսին մանաթի նոր արժեզրկմանը: Չի բացառվում, որ դա կարող է արվել ավելի վաղ»,- նշել է Գուբադօղլուն:

Ավելորդ չէ հիշեցնել, որ Ադրբեջանի արտահանման 95 տոկոսը կազմում են գազը, նավթն ու նավթամթերթքները, իսկ երկրի պետբյուջեն 87 տոկոսով ձևավորվում է էներգակիրների արտահանումից ստացվող եկամուտների հաշվին:

Ադրբեջանի 2015 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայում այն արդեն պետբյուջեում նախատեսվածից մոտ 44 դոլարով ցածր է: