ՀԲԸՄ-ն իր երկարամյա գործունեության տեսլականն ամրապնդում է հայրենիքում

Հայկական բարեգործական ընդհանուր միությունն արդեն Հայաստանում ունի սեփական շենքը: Երևանում ապրիլի 4-ին տեղի ունեցավ Հայկական բարեգործական ընդհանուր միության կենտրոնատեղիի նորակառույց շենքի բացումը, որին մասնակցեց ՀՀ Նախագահ Սերժ Սարգսյանը:

Լրագրողների հետ զրույցում շենքի ճարտարապետ, ֆրանսահայ Արիս Ադամյանը, ներկայացնելով կառույցի ճարտարապետական լուծումներն, ընդգծեց, որ շենքը Երևանում արդիական և պատմական ճարտարապետական ոճերի համադրություն է: Քաղաքի ճարտարապետական դիմագիծը պահպանելու նպատակով ՀԲԸՄ-ի շենքի կառուցման համար օգտագործվել են 1906թ. կառուցված և 2000թ. ապամոնտաժված քաղաքային դումայի շենքի քարերը: Ներքին հարդարանքն առանձնանում է արդիական ոճով և առաջնակարգ հարմարություններով: «Շենքի ճակատն ապակեպատ դիզայնի և հին Երևանի ճարտարապետական տարրերի մ իահյուսում է: Ապակեպատ ճակատը արևի լույսի առավելագույն ներթափանցման հնարավորություն է տալիս՝ ստեղծելով հարմարավետ ու ոգեշնչող աշխատանքային միջավայր: Կենտրոնում տեղակայված են գրասենյակներ, համաժողովների սրահներ ու ցուցասրահներ: Ներքին հարդարանքը հագեցած է ժամանակակից հարմարություններով ու արդիական դիզայնի տարրերով: Շինությունը համապատասխանում է շինարարական բոլոր առաջատար չափանիշներին, իսկ նորագույն տեխնոլոգիաների՝ ջերմամեկուսիչ երեսպատման սալիկների և արևային մարտկոցների շնորհիվ շենքը դասվում է միջավայրակայուն կառույցների շարքին: Արևային մարտկոցների հաշվին շենքը հոսանքի առումով ինքնաբավ է, ինչը մենք շատ ենք կարևորում»,- ընդգծեց Ադամյանը:

ՀԲԸՄ-ն նախկինում Երևանում սեփական շենք չի ունեցել: Նախկինում միությունն իր տրամադրության եղած բոլոր շենքերը վարձել է, իսկ այս մեկն արդեն միության սեփականն է:

ՀԲԸՄ կենտրոնական վարչական ժողովի անդամ Վազգեն Յաղուբյանը նշեց, որ շենքի բացումը մեծ ուրախություն և հպարտություն է իրենց համար: «Ինչպես գիտեք՝ Հայկական բարեգործական ընդհանուր միությունն ի սկզբանե եղել է Հայաստանի կողքին, և այսօր մենք շատ ուրախ ենք, որ ունենք մեր սեփական շենքը, որի միջոցով մեր 100-ամյա գործունեության տեսլականը նոր միջոցառումների և նախաձեռնությունների տեսքով կամրապնդենք հայրենիքի մեջ: Եվ մեր ծրագրերը ոչ միայն պիտի լինեն ի նպաստ Հայաստանում ապրող հայերի, այլև Սփյուռքի մեր հայրենակիցների, հատկապես երիտաս արդների: Մենք ցանկանում ենք այստեղ իրականացվող ծրագրերի միջոցով ավելի շատ երիտասարդների ընդունել հայրենիք՝ նրանց մեջ առավել զորացնելով հայ լինելու զգացումը»,- եզրափակեց Յաղուբյանը:

ՀԲԸՄ նախագահ Պերճ Սեդրակյանն էլ ընդգծեց, որ այս օրը պատմական օր է Հայկական ընդհանուր բարեգործական միության համար: «Մենք, սկսած մեր հիմնադրման օրվանից՝ 1906թ.-ից, ունեցել ենք մեր կենտրոնները, շենքերը Կահիրեում, Ալեքսանդրիայում, Հալեպում, Հունաստանում, Ֆրանսիայում, Կանադայում, Հարավային Ամերիկայում, բայց այսօր մենք վերադառնում ենք տուն և ունեցանք մեր շենքը, որը մեր ազգային գիտակցության խորհրդանիշն է»,- ասաց Սեդրակյանը: