Սուրբ Զատկի տոնին նվիրված փառատոն Գյումրիում

Գյումրիում տեղի ունեցավ Սուրբ Զատկի տոնի խորհրդին նվիրված փառատոն: Ամենամյա դարձած փառատոնն անցկացվում է «ԱՐՄ ստրոնգ» երիտասարդական կազմակերպության և «Սուրբ Հակոբ» երիտասարդաց միության նախաձեռնությամբ՝ «Վորլդ Վիժն» կազմակերպության աջակցությամբ: Երկօրյա փառատոնի մեկնարկն ազդարավել էր «Սուրբ Հակոբ Մծբնեցի» եկեղեցու բակում ապրիլի 4-ին' ժ ամը 18:00-ին՝ երեկոյան պատարագից հետո՝ բացօթյա կինոդիտումով, իսկ ապրիլի 5-ին փառատոնը շարունակվեց խաղերով, մրցույթներով, երգ ու պարով:

Ինչպես «Արմենպրես»-ին տեղեկացրեց «Սուրբ Հակոբ» երիտասարդաց միության ատենապետ, «ԱՐՄ ստրոնգ» երիտասարդական կազմակերպության նախագահ Միշա Պողոսյանը, արդեն հինգերորդ տարին անցկացվող փառատոնը նպատակ ունի հասարակության լայն շերտերին ներկայացնելու տոնը, ինչպես նաև իրականացնելու տարատեսակ մշակութային միջոցառումներ: «Ամեն տարի տաղավար տոներին նվիրված միջոցառումներ իրականացվում են, բայց զատկական միջոցառումն ավելի մասսայական է: Սուրբ Զատիկն այն տոնն է, որն իր գունեղ երանգներով, իր ծիսական ու ժողովրդական սովորույթներով առավել ուշադրության է արժանանում: Թեև երիտասարդներն հիմա ավելի մոտ են եկեղեցուն, սակայն շատերն ունեն սխալ ու թերի ինֆորմացիա տոնի ավանդույթների ու ծեսերի հետ կապված: Այս միջոցառման ընթացքում փորձ է արվում մատուցելու իրականն ու ավանդականը՝ ներգրավելով նաև եկեղեցուն' ներկաներին մատուցելով զատկական արարողակարգը»,- նշեց Միշա Պողոսյանը:

Փառատոնի ընթացքում մրցույթներին ու խաղերին հաղթող փոքրիկներն ստացան անակնկալ նվերներ: