Գավառում երկրաշարժն առավել զգացվել է բազմաբնակարան շենքերում

Գեղարքունիքի մարզում ապրիլի 6-ի առավոտյան ժամը 5.26-ի սահմաններում գրանցված երկրաշարժն առավել անհանգստացրել է Գավառ քաղաքների բազմաբնակարան շենքերի բնակիչներին' քնից արթնացնելով և վախ ու անհանգստություն պատճառելով շատ ընտանիքների: Ցնցվել ու ճոճվել են բնակարանների առաստաղները, հատակները, պատերը: Բարեբախտաբար, ցնցումները տևել են մինչև քսան վայրկյան և դադարել են' հանդարտեցնելով նաև քնից արթնացած մարդկանց խուճապային տրամադրությունները:

«Մեր տունը գտնվում է բազմաբնակարան շենքի հինգերորդ հարկում: Այս գիշեր մեր ընտանիքը բոլորի պես խաղաղ քնած էր: Հանկարծ բոլորս արթնացանք անակնկալ ցնցումներից: Ճոճվում էին առաստաղը, հատակը, պատերը: Մինչ կհասցնեինք լքել մեր մահճակալները, ցնցումները դադարեցին»,- «Արմենպրես»-ի հետ զրույցում նշեց Գավառ քաղաքի բնակիչ Արփիկ Կակոյանը:

Համաձայն ՀՀ տարածքային կառավարման և արտակարգ իրավիճակների նախարարության կողմից տարածած հաղորդագրության' Սեյսմիկ պաշտպանության ծառայության կողմից ապրիլի վեցի առավոտյան ժամը 5.26-ի սահմաններում գրանցվել է 3,5 մագնիտուտով երկրաշարժ, որը 4-5 բալ ուժգնությամբ զգացվել է Գեղարքունիքի մարզի Մարտունի և Գավառ քաղաքներում, Երանոս գյուղում և Երևանում:

Խոսրով Խլղաթյան