Հրանտ Բագրատյանը` մտավորականության որոշ «ներկայացուցիչների» ողորմելի վիճակի մասին

Հայ կինոգործիչները «Կինոյի մասին» օրենք ունենալն անհրաժեշտություն են համարում և նշում են, որ օրենքը մի շարք առավելություններ կտա:

ՀՀ մշակույթի նախարարի հրամանով` ստեղծվել է մասնագիտական հանձնաժողով: Հանձնաժողովում ընդգրկված են ոլորտի առաջատար մասնագետները:

Հայաստանի ազգային կինոկենտրոնի տնօրեն Գևորգ Գևորգյանը այսօր կայացած մամուլի ասուլիսի ընթացքում ասել է, որ ֆիլմարտադրության ոլորտը պիտի կարգավորի, և պետք է որոշակի սահմանափակում լինի այսօր ցուցադրվող ֆիլմերի առնչությամբ, քանի որ շատ ֆիլմեր դաժանություն և էրոտիկա են քարոզում. «Պետք է այնպես արվի, որ պետպատվերով ավելի շատ ֆիլմեր արտադրվեն, հնարավորություն ընձեռվի, որ կինոցուցադրողը շահագրգռված լինի հայկական ֆիլմեր ցուցադրել»,- ասաց Գևորգյանը:

Ասուլիսին ներկա ռեժիսոր Էդգար Բաղդասարյանը հիշեցրեց անցյալի փորձը երբ, ըստ իրեն, 1990-ականներին ՀՀ վարչապետը՝ Հրանտ Բագրատյանը, ասել է, թե կինոարտադրողից ու նրբերշիկ արտադրողից պետք է նույն քանակությամբ հարկ գանձվի.

«Արդյունքում՝ մեր կինոն նրբերշիկ դարձավ. նրբերշիկի արտադրության պես՝ յուրաքանչյուր շքամուտքում 7 ռեժիսոր և 60 դերասան հայտնվեց»,-ասում է Էդգար Բաղդասարյանը և հավելում. «Մարդիկ ֆիլմի 2000 դրամանոց տոմս են գնում, որը դիտելու համար դեռ պետք է իրենց վճարեն»:

Ասուլիսում հնչած կարծիքները նախկին վարչապետ Հրանտ Բագրատյանի կողմից անարձագանք չմնացին: Բագրատյանը, պատասխանելով իր մասին հնչեցված քննադատությանը, պատասխանել է.

«Շատ հետաքրքիր է։ Սա վկայում է մեր մտավորականության որոշ «ներկայացուցիչների» ողորմելի վիճակի մասին։ Եվ սա այն դեպքում, երբ ես առաջինն եմ եղել, որ պարտավորվեց կինոյի պետական պատվեր իջեցնել պատերազմի ծանր տարիներին։ Ի դեպ, այդ պատվերներում հարկերը հաշվում են։ Համադրելի գներով վստահ չեմ, որ պետբյուջեից կինոմատոգրաֆները հիմա ավելին են ստանում, քան 1994-1996-ին։ Եվ ուրեմն ո՞րն է խնդիրը։ Այս «մտավորականները» դժգոհ են։ Բայց հո չեն կարող կոնկրետ դժգոհություն արտահայտել ներկա իշխանություններին։ Այդ դեպքում ամեն ինչից կզրկվեն։ Իսկ մենք դեմոկրատ ենք։ Մեզ կարելի էր։ Հետո, արի մի բան ասեմ, էլի, սիրտս թեթևացնեմ։ Համ էլ ասածս, ըստ իրենց, կոնկրետ կլինի. կարելի՞ է մի հատ ապացույց ներկայացնել, թե ես նման բան եմ ասել»։