«168 Ժամ». Իրանական գազի տարանցումը Հայաստանի հետ կապ չի ունենալու

«Ի՞նչ իմաստ կա իրանական գազը տարանցել Եվրոպա Հայաստանով և Վրաստանով»,- «168 Ժամ» թերթի հետ զրույցում նման զարմանք է հայտնել Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն, տնտեսական և քաղաքական վերլուծաբան Կոնստանտին Սիմոնովն` անդրադառնալով Իրանի էներգետիկ դերի բարձրացմանն աշխարհում, նավթի գների հնարավոր փոփոխություններին և հայ-իրանական հարաբերությունների խորացմանը՝ Լոզանում ձեռք բերված պայմանավորվածությունների իրագործումից հետո:

«Նայեք քարտեզին, ինչի՞ համար պետք է Իրանից գազ արտահանվի Հայաստանի և Վրաստանի միջոցով: Ի՞նչ իմաստ կա: Իհարկե, եթե նման պրոյեկտներ իրագործվեն, ապա Իրանը կնախընտրի Թուրքիայով միանգամից Եվրոպական միություն դուրս գալ: Ծիծաղելի է, ինչո՞ւ Հայաստանը, եթե Իրանն ուղիղ սահման ունի Թուրքիայի հետ, քարտեզին պետք է նայել: Իրանական գազ չի կարող Արևմուտք արտահանվել Հայաստանի միջոցով: Վրաստանի միջոցով արտահանվում է միայն ադրբեջանական գազ, քանի որ Ադրբեջանը Թուրքիայի հետ ուղիղ սահման չունի, այստեղ գաղտնիքը պարզ է, ուստի իրանական գազի տարանցումը Հայաստանի հետ կապ չի ունենալու»,- ասաց Սիմոնովը` շարունակելով, որ նման ծրագրերի իրագործման համար նույնիսկ պետք է 15-20 տարի ապրել, քանի որ տարանցումը բարդ գործընթաց է:

«Վախենամ, որ պետք է հիասթափեցնեմ նրանց, ովքեր մտածում են իրանական գազ Արևմուտք արտահանելու մասին, առավել ևս՝ Հայաստանի միջոցով: Եթե Դուք Հայաստանով, Վրաստանով գազամուղ կառուցեք, այն դեպի ո՞ւր պետք է գնա, Սև ծովով պետք է գնա Բուլղարիա՞, կամ ինչպե՞ս: Ես նման պրոյեկտների իրագործելիության մասին դեռ չեմ լսել»,- ասաց Սիմոնովը: Նրա համոզմամբ' Իրանի «ապաշրջափակումից» հետո Իրանի էներգետիկ նշանակությունն այնքան չի աճելու, որ նավթի գները սկսեն կտրուկ անկում գրանցել:

Ըստ նրա' ավելին՝ կա Արաբական թերակղզում ծավալվող զարգացումների հարցը, որոնք կարող են փոխել իրերի դրությունը' համաշխարհային շուկայում բարձրացնելով նավթի գները:

Շարունակությունը՝ թերթի այսօրվա համարում: