ԱՄՆ-ում ստեղծված զարթուցիչն առանձին է արթնացնում նույն անկողնում քնածներին

Նոր տիպի Wake զարթուցիչն ուլտրաձայնի միջոցով «անհատական լուսաբաց» է ստեղծում անկողնում գտնվողներից մեկի համար՝ չանհանգստացնելով մյուսին: Սարքի համար միջոցների հանգանակություն է հայտարարվել Kickstarter-ի քրաուդֆանդինգյան ծառայությունում, տեղեկացնում է «Արմենպրես»-ը:

Wake-ն Wi-Fi-ով միացվում է սմարթֆոնի հավելվածին, որը նշում է այն մարդուն, ով արթնանալու կարիք ունի: Այնուհետև գաջեթը մահճակալի վրա նրան գտնում է մարմնի ջերմային ճառագայթման տվիչի միջոցով:

Դրանից հետո սարքը կիզակետված ուլտրաձայնային ալիք է ուղարկում քնածի կողմը: Սարքը տալիս է շատ նեղ ուղղորդված ալիք, որն արթնացնում է սոսկ մեկ հոգու: Միաժամանակ նրա դեմքին ավելի ու ավելի պայծառ լույս է արձակում սպիտակ լուսադիոդներով լամպը. այն նմանակում է արևի լույսը, ինչը նպաստում է ավելի բնական արթնացմանը: Եթե, արթնանալով, մարդը շրջվի մյուս կողմը և կրկին քնի, Wake-ն դարձյալ կսկսի ընթացակարգը և կանջատվի այն ժամանակ, երբ մարդը վեր կենա անկողնուց:

Գաջեթն ստեղծել են Լոս Անջելեսի Lucera Labs ընկերությունում, որը Kickstarter-ում սկսել է միջոցների հանգանակման արշավը: Wake-ի արտադրության համար պլանավորում են հանգանակել 100 հազար դոլար: Արշավի հաջողության դեպքում առաջին սարքերն օգտատերերը կարող են ստանալ 2015 թվականի սեպտեմբերին: Մեկ Wake-ի արժեքը կազմում է 250 դոլար: