«Ժողովուրդ». «Սեֆիլյանի և նրա թիմակիցների տանը խուզարկության ժամանակ իրավապահները գտել են մահակներ»

Հայաստանում քաղբանտարկյալների թիվը երեկ հինգով ավելացավ: Առավոտյան լուրեր ստացվեցին, որ ՀՀ իրավապահները սկսել են ձերբակալել «Հիմնադիր խորհրդարան» նախաձեռնության ղեկավար կազմին: Միաժամանակ խուզարկություններ էին ընթանում նախաձեռնության երևանյան և մի քանի մարզային գրասենյակներում ու բերման ենթարկվածների բնակարաններում: Աղվան Հովսեփյանի գլխավորած քննչական կոմիտեի՝ երեկ երեկոյան տարածած հաղորդագրության համաձայն՝ ձերբակալվածները հինգն են՝ Ժիրայր Սեֆիլյան, Վարուժան Ավետիսյան, Պավել Մանուկյան, Գևորգ Սաֆարյան և Գարեգին Չուքասզյան:

«Ժողովուրդ»-ը դեռևս մարտի 19-ի համարում գրել էր, որ ՀՀ ղեկավարությունը հրահանգել է առնվազն մինչև ապրիլի վերջը մեկուսացնել Ժիրայր Սեֆիլյանին և նրա կողմնակիցներից մի քանիսին: Սակայն հարց էր, թե ինչպես էին դա անելու: Ինչպես ցույց տվեց ժամանակը՝ բոլոր սադրանքները, այդ թվում քրեական տարերի ներգրավմամբ, օգուտ չտվեցին: Ուստի միակ հույսը, ինչպես միշտ, մնաց փորձառու Աղվան Հովսեփյանի երևակայությունը, որն էլ գործի է դրվել: Չէ՞ որ Հովսեփյանը գործեր է սարքել «սովետների» ժամանակ, ԽՍՀՄ-ի, ՀՀՇ-ի, Ռոբերտ Քոչարյանի, Սերժ Սարգսյանի իշխանության տարիներին: Դա եղել է նրա գլխավորած իրավապահ կառույցի առջև դրված գերագույն պայմանը:

Հ. Գ. «Ժողովուրդ»-ը տեղեկացել է, որ Սեֆիլյանի և նրա թիմակիցների տանը խուզարկության ժամանակ իրավապահները հիմնականում գտել են մահակներ: Իսկ թե դրանք ինչ տեսք ու վտանգավորություն ունեն, մեկնաբանության հարց է: Հարկ եղած դեպքում նույնիսկ «պոլիփեդ» պահելու համար կարելի է մարդուն զանգվածային անկարգություններ կազմակերպելու մեղադրանք առաջադրել: Ի վերջո, Աղվան Հովսեփյանն այդ փորձը կիրառել է դեռ 2008-ին՝ հարյուրավոր քաղաքացիների լցնելով բանտերը»: