Լուկաշենկոյի այցի շրջանակներում Թբիլիսիում կանցկացվի վրաց-բելառուսական գործարար համաժողով

Թբիլիսիի «Թբիլիսի-Մարիոտ» հյուրանոցում ապրիլի 22-ին կանցկացվի վրաց-բելառուսական գործարար համաժողով: Միջոցառումը նվիրված է երկու երկրների տնտեսական հարաբերություններին և հեռանկարներին: Այդ մասին, ինչպես տեղեկացնում է «Արմենպրես»-ը, «Նովոստի Գրուզիա»-ին հայտնել են Վրաստանի առևտրա-արդյունաբերական պալատում (ՎԱԱՊ):

Տեղեկատվության համաձայն՝ բելառուս գործարարների պատվիրակությունը Վրաստան կժամանի Բելառուսի նախագահ Ալեքսանդր Լուկաշենկոյի այցի շրջանակներում, որը տեղի կունենա ապրիլի 21-23-ը:

Միջոցառման շրջանակներում վրացական և բելառուսական ընկերությունների միջև կանցկացվեն երկկողմ հանդիպումներ, ինչպես նաև Բելառուսի սննդամթերքի ցուցահանդես:

Բելառուսական բիզնես-պատվիրակության կազմում ընդգրկված են 37 ընկերությունների 44 աշխատակիցներ, որոնք ներկայացնում են էներգետիկան, տրանսպորտը և լոգիստիկան, լայն սպառման էլեկտրասարքավորումները, սննդամթերքը, ճանապարհա-շինարարական հատուկ տեխնիկան, էթիլային սպիրտն ու ոգելից խմիչքները, քիմիական և նավթաքիմիական արտադրանքը, դեղորայքը, կենցաղային քիմիան, մսամթերքը, գյուղատնտեսական հատուկ տեխնիկան և այլ ոլորտներ:

ՎԱԱՊ-ում հայնել են, որ բելառուսական ընկերությունները շահագրգռված են գործընկերային հարաբերությունների հաստատմամբ և վրացի գործընկերների հետ առևտրատնտեսական համագործակցության ակտիվացմամբ: