Ծովի հատակից «Սևոլ» լաստանավը բարձրացնելու համար կպահանջվի 110 մլն դոլար

Անցյալ տարի խորտակված հարավկորեական «Սևոլ» լաստանավը ծովի հատակից բարձրացնելու համար կպահանջվի ավելի քան 120 մլրդ վոն (110 մլն դոլար): Այդ մասին, ինչպես տեղեկացնում Է «Արմենպրես»-ը, հաղորդել Է Կորեայի Հանրապետության (ԿՀ) ծովային գործերի և ձկնորսության նախարարությունը:

Իսկ ընդամենը, ըստ այս գերատեսչության գնահատումների, ողբերգության բոլոր հետևանքների ամբողջական վերացման համար կպահանջվի ավելի քան 550 մլրդ վոն (504 մլն դոլար):

«Կառավարությունն արդեն 185,4 մլրդ վոն (169,9 մլն դոլար) Է ծախսել որոնողա-փրկարարական գործողությունների, ինչպես նաև տուժածների և զոհվածների ընտանիքներին օգնելու համար»,-նշել են նախարարությունում:

Հարավային Կորեայի նախագահ Պակ Կին Հեն խոստացել Է քննարկել խորտակված «Սևոլ» լաստանավը ծովի հատակից հանելու հնարավորությունն այն բանից հետո, երբ դա պահանջել են զոհվածների ընտանիքները:

Ավելի վաղ «Ռյոնհապ» գործակալությունը հաղորդել Է, որ Հարավային Կորեայի կառավարությունը կսկսի փոխհատուցումներ վճարել «Սևոլ» լաստանավի խորտակման հետևանքով զոհվածների և անհայտ կորածների ընտանիքներին:

«Սևոլ» մարդատար լաստանավը խորտակվել Է 2014 թվականի ապրիլի 16-ին: Հարավային Կորեայի արդի պատմության մեջ ամենախաշոր ողբերգություններից մեկի զոհ Է դարձել 295 մարդ, որոնցից 250-ը 15-ից մինչև 19 տարեկան դպրոցականներ են: Մինչ այժմ չեն գտնվել ինը մարդու մարմիններ: Ընդամենը վթարի պահին նավի վրա եղել Է 476 մարդ: Լաստանավի խորտակման հետևանքով անհայտ կորածների որոնման գործողությունը դադարեցվել Է 2014 թվականի նոյեմբերին՝ կապված դրա անցկացման բարդության հետ:

Զոհված յուրաքանչյուր դպրոցականի համար փոխհատուցում Է նախատեսված մինչև 420 մլն վոնի (մոտավորապես 378 հազար դոլար) չափով: Այդ չարաբաստիկ ուղևորության ընթացքում աշակերտներին ուղեկցող ուսուցիչների ընտանիքներին նախատեսվում Է վճարել մինչև 760 մլն վոն (մոտավորապես 685 հազար դոլար): «Սևոլի» անհայտ կորած ուղևորների ընտանիքները նույնպես ներառված են փոխհատուցման վճարումների ցուցակներում:

Լաստանավի խորտակման գործով մեղադրվում Է 399 մարդ, ձերբակալված են 154-ը: 2014 թվականի նոյեմբերին Հարավային Կորեայի Կվանջու քաղաքի դատարանը «Սևոլի» նավապետին, որն ուղևորի տեսքով առաջիններից մեկն Է լքել խորտակվող նավը, մեղավոր Է ճանաչել արտակարգ իրավիճակում անփութություն դրսևորելու մեջ, ինչը հանգեցրել Է մարդկանց զոհվելու, և նրան դատապարտել Է 36 տարվա բանտային կալանքի: Անձնակազմի ևս 14 անդամներ դատապարտվել են 5-ից մինչև 30 տարվա ազատազրկման, հաղորդել Է ՌԻԱ Նովոստին: