Հայ ուսանողները հանդիպել են ԱՄԷ Հանդուրժողականության նախարարի հետ

ՀՀ-ում ԱՄԷ դեսպանատան նախաձեռնությամբ ԱՄԷ-ում գտնվող ԵՊՀ Արևելագիտության ֆակուլտետի Արաբագիտության բաժնի ուսանողները յոթօյա ուսումնական այցի շրջանակներում հանդիպել են ԱՄԷ Հանդուրժողականության նախարար Շեյխ Նահյան բն Մուբարաք Ալ-Նահյանի հետ: Հանդիպման ընթացքում ուսանողները կիսվել են ԱՄԷ-ի վերաբերյալ իրենց տպավորություններով, անդրադարձել երկրում տիրող անվտանգության մթնոլորտին, էթնոմշակութային և կրոնական բազմազանությանն, ինչն, անշուշտ, փաստում է Արաբական Միացյալ Էմիրություններում հանդուրժողականության առկայության մասին։ Իր հերթին նախարար Ալ Նահյանը բարձր է գնահատել հայ ուսանողների արաբերենի իմացությունն ու գիտելիքներն արաբական մշակույթի և արաբ ժողովրդի պատմության մասին: Նախարարը նշել է, որ Արաբական Միացյալ Էմիրությունները հանդուրժողական պետություն է և համարվում է առանց խտրականության բաց երկիր` մատնանշելով, որ իր երկրում բնակվում են ավելի քան 200 ազգությունների ներկայացուցիչներ: Ապա ավելացրել է, որ ԱՄԷ-ն այն երկրների շարքում է, որոնք ներառում են տարբեր կրոնների մեջ առկա համակեցության և եղբայրության արժեքներն ու սկզբունքները: Հանդիպումից հետո ուսանողներն այցելել են Զայիդ նշանավոր մզկիթ:

Ուսումնական այցի շրջանակներում հայ ուսանողները նաև այցելել են Շարժայի համալսարան, ԱՄԷ-ի և Օմանի սահմանին գտնվող Ալ Այն քաղաք:

Դեկտեմբերի 18-ին ԵՊՀ Արևելագիտության ֆակուլտետի Արաբագիտության ամբիոնի նախաձեռնությամբ տեղի է ունեցել Արաբերենի միջազգային օրվան նվիրված միջոցառում, որին ներկա էին ՀՀ-ում արաբական երկրների դեսպաններ, այդ թվում ՀՀ-ում ԱՄԷ դեսպան Ջասսիմ Մոհամմադ ալ Կասիմին: Միջոցառման ընթացքում Արաբագիտության ամբիոնի ուսանողները ներկայացրել են արաբ հեղինակների բանաստեղծություններ և երգեր, ապա տեղի է ունեցել արաբերենին նվիրված շարադրությունների մրցույթ: 

ՀՀ-ում ԱՄԷ դեսպան Ջասսիմ Մոհամմադ ալ Կասիմիի նախաձեռնությամբ մրցույթի մասնակիցները հնարավորություն են ստացել ԱՄԷ-ում մասնակցել ուսումնական ծրագրի, որի նպատակն է խրախուսել արաբերեն լեզվի ուսուցումը հայ ուսանողների շրջանում և ծանոթացնել նրանց ԱՄԷ պատմության ու մշակույթի հետ: