Դդմասարում ՀՀԿ-ական թեկնածուն գյուղապետ է դարձել 35 քվեով. ՏԻՄ ընտրություններ

Քաղաքական 12 Մարտ, 2018 12:00

Հայաստանի 7 մարզի 20 համայնքում մարտի 11-ին անցկացված տեղական ինքնակառավարման մարմինների ընտրություններին, նախնական տվյալներով, մասնակցել է ընտրողների 44.91 տոկոսը կամ 10 հազար 246 ընտրող։

Նշված 20 համայնքներից 4-ում տեղի ունեցան միայն համայնքի ղեկավարի, 6 համայնքում` միայն ավագանու անդամների, և 10 համայնքում՝ միաժամանակ համայնքի ղեկավարի և ավագանու անդամի ընտրություններ:

ԿԸՀ-ն հրապարակել է նախօրեին 14 համայնքում նախօրեին տեղի ունեցած ՏԻՄ ընտրությունների արդյունքները, ըստ որոնց՝

Կոտայքի մարզի Հացավան համայնքում առաջադրված միակ թեկնածուն՝ ԲՀԿ-ական Շավարշ Սարգսյանը ստացել է 169 ձայն:

Արագածոտնի մարզի Դդմասար գյուղում հաղթող է ճանաչվել գործող գյուղապետ, միակ թեկնածու, ՀՀԿ անդամ Ռաշիդ Օսեյանը: Նա ստացել է 35 կողմ և 3 դեմ ձայն: 3 քվեաթերթիկ ճանաչվել է անվավեր:

Արարատի մարզի 7 համայնքում՝ Դարբնիկում, Եղեգնավանում, Զորակում, Խաչփառում, Հայանիստում, Նիզամիում և Սիսում առաջադրված գործող բոլոր ՀՀԿ-ական գյուղապետերը նույնպես հաղթել են:

Արարատի մարզի Սայաթ-Նովա համայնքում էլ առաջադրված համայնքապետ Ռազմիկ Ալավերդյանը, որը «Բարգավաճ Հայաստան» կուսակցության անդամ է, նույնպես հաղթել է՝ ստանալով 543 ձայն: Ռազմիկ Ալավերդյանին դեմ է քվեարկել 200 քաղաքացի, իսկ 51 քվեաթերթիկ ճանաչվել է անվավեր:

Արմավիրի մարզում Մեծամոր համայնքում ևս մրցակցություն չի եղել: Գործող ՀՀԿ–ական՝ համայնքապետ Էդվարդ Միրզոյանը ստացել է 315 կողմ

և 1 դեմ ձայն:

Արարատի մարզի Նորամարգում հաղթել է ՀՀԿ-ական Արման Թադևոսյանը՝ ստանալով 391 քվե: Նրա մրցակիցներից՝ ՀՀԿ-ական Արմեն Գևորգյանը ստացել է 382 ձայն, իսկ անկուսակցական Արմեն Ղահրամանյանը՝ 182: Նշենք, որ գործող գյուղապետը չէր առաջադրվել:

Լոռու մարզի Դեբետ համայնքում հաղթել է Աշոտ Ղազարյանը՝ ստանալով 153 ձայն: Նշենք, որ այստեղ 4 թեկնածու կար: