Կարապետյանին դիմադրում են ՀՀԿ-ի ներսից

Կառավարության արձանագրած 7 տոկոս տնտեսական աճի, Կառավարության գործունեությունից սպասվող արդյունքների և Հայաստանում ընթացող ներքաղաքական զարգացումների մասին ԼՈւՐԵՐ․com-ը զրուցեց նախկին պատգամավոր, ՎՍԴՀԿ ատենապետ Լյուդմիլա Սարգսյանի հետ։

-Տիկի՛ն Սարգսյան, Կառավարությունն, ըստ ներկայացված վիճակագրության, արձանագրել է 7 տոկոս և ավելի տնտեսական աճ։ Արդյո՞ք այդ աճը Ձեզ վրա զգացել եք։ Հավատո՞ւմ եք նեկայացված վիճակագրությանը։

-Թե ինչքան է կազմել տնտեսական աճը՝ չեմ կարող ասել։ Բայց մի բան հստակ է՝ արձանագրվել է թանկացում։ Ճիշտն ասած՝ այն, որ Կարապետյանի կառավարությունն ինչ-որ բաներ անում է՝ հստակ է, պարզապես մեր երկրի նման երկրում տնտեսական աճը, այն էլ 7 տոկոս, այդքան  արտահայտիչ լի կարող լինել։ Ես աճ ինձ վրա չեմ զգացել: Մյուս կողմից՝ պետք է արձանագրենք, որ Կառավարությունը գործում է դիմադրության պարագայում։ 

-Ի՞նչ դիմադրության մասին է խոսքը, չէ՞ որ սա Հանրապետական մեծամասնության Կառավարությունն է, ո՞վ է նրանց դիմադրում։ 

 -Կարապետյանը փորձում է ինչ-որ բաներ անել, բայց շատ մեծ  է դիմադրությունը հենց գործող Հանրապետականի ներսից և ձևավորված համակարգի կողմից։ Իմ կարծիքով՝ և՛ Կարապետյանը, և՛ նախագահ Արմեն Սարգսյանը կարող են բան փոխել մեր երկրում և այդ տեսակը որքան շատ լինի քաղաքականության մեջ, այնքան լավ։ Շատ կարևոր է երկիր ներկայացնելու տեսանկյունից՝ ղեկավարի տեսակը, որից շատ բան է կախված։

-Այսինքն՝ հերքո՞ւմ եք պնդումը, որ վարչապետն ու նախագահը կգործեն այնքան, որքան նրանց թույլ կտա Սերժ Սարգսյանը։ 

-Վստահ եմ, որ նրանք կանեն այն, ինչ պարտավորված են Սահմանադրությամբ և այն, ինչը չի հակասում Սահմանադրությանը։ Վստահ եմ, որ նրանք կօգտագործեն իրենց կապերը որոշ խնդիրներ շրջանցելու և հօգուտ Հայաստանի որոշումներ կայացնելու համար։ 

-Մեզանում Կարապետյանն ընկալվում է ռուսական, իսկ նախագահ Սարգսյանը՝ Արևմուտքի քաղաքական գործիչ։ Ձեր կողմից նրանք ինչպե՞ս են ընկալվում։ 

-Ես չեմ տարբերակում ռուսական և արևմտյան կլաններ ասվածը։ Նրանք երկուսն էլ հայ են և ամեն ինչ կանեն որպես հայ քաղաքական գործիչ։ Իսկ այն, որ ընդգծում են, որ մեր քաղաքական գործիչները ռուսական կողմին են հարում, դա միշտ էլ եղել է։ Դա նորմալ է, չէ՞ որ ռուսական կողմը մեզ առաջարկում է անվտանգության երաշխիք։ Այդ անվտանգության երաշխիքից հրաժարվել քարոզողները պետք է մի փոքր պատասխանատվություն կրեն իրենց առաջարկի համար։ Ռուսաստանի տված անվտանգության երաշխիքից հրաժարվենք, ուրիշ ո՞ւմ ընտրենք։  

Հարցազրույցն՝ Աղավնի Սուքիասյանի