Ցանկացած բարեփոխում ազդում է ավիատոմսի գնի վրա. Սերգեյ Ավետիսյան

Կառավարության որոշմամբ «Հայաէրոնավիգացիա» ՓԲԸ-ն և «Զվարթնոց» աէրոօդերեւութաբանական կենտրոն» ԲՓԸ-ն միավորվելու են: Կառավարության նիստից հետո լրագրողների հետ զրույցում Քաղաքացիական ավիացիայի գլխավոր վարչության պետ Սերգեյ Ավետիսյանը նշեց, որ արդյունքում լինելու է «մեկ պատուհանի» սկզբունքով գործող կառույց, որը մատուցելու է աէրոնավիագացիայի ամբողջական փաթեթով ծառայություններ: «Հավելյալ պայմանագրեր, հավելյալ վճարներ վճարելու հարցը վերացվելու է: Սա բոլոր կողմերը դրական են համարում, այդ թվում դրական է բիզնես-միջավայրի տեսանկյունից»,- ասաց Ավետիսյանը՝ ավելացնելով, որ այս պահին օդերևութաբանական ծառայությունների համար վճարը կազմում է շուրջ 30 հազար դրամ՝ թռիչքի ու վայրէջքի համար, որը այս բարեփոխման արդյունքում վերանալու է:

Հարցին, թե արդյոք դա չի՞ անդրադառնա տոմսի գների վրա, ՔԱԳՎ պետն ասաց. «Չեմ կարծում, որ ուղիղ անդրադարձ ունենա տոմսի գնի վրա, բայց ինքը կփոխի մոտեցումը, աշխատանքի տրամաբանությունը, կստեղծի ավելի տրամաբանված միջավայր, որտեղ տնտեսավարողներն իրենց ավելի լավ կզգան: Ընդհանուր առմամբ, ցանկացած բարեփոխում, որ արվում է մեր ոլորտում, անուղղակի ձևով, այս կամ այն կերպ ազդում է տոմսի գնի վրա, քանի որ ցանկացած փոփոխություն բերում է նրան, որ հետաքրքրությունը հայկական ավիացիոն շուկայի նկատմամբ ավելանում է, տնտեսավարողներն ավելանում են, տրամաբանորեն ավելանում է մրցակցությունը և նվազում է տոմսի գինը»: