«Այս բեսպրեդելության հեղինակը ՇՊՀ-ի ռեկտորն ու Լևոն Մկրտչյանն են». Գագիկ Համբարյան

Շիրակի պետական համալսարանի դասախոս, քաղաքագետ Գագիկ Համբարյանին ազատել են աշխատանքից: ԼՈւՐԵՐ.com-ի թղթակցի հետ զրույցում Գագիկ Համբարյանը նշեց, որ թեև որոշումը կայացրել է բուհի էթիկայի հանձնաժողովը, բայց այս ամենի ետևում կանգնած են համալսարանի ռեկտոր Սահակ Մինասյանը, Կրթության ու գիտության նախարար Լևոն Մկրտչյանը: 

«Այսօր պարոն Մինասյանի կողմից ծանուցում ստացանք: Իրենք ձևավորեցին ապօրինի գիտական խորհուրդ, ստեղծեցին էթիկայի հանձնաժողով, որն էլ որոշել է ազատել ինձ աշխատանքից: Սակայն զավեշտալին այն է, որ այդ հոդվածների համաձայն՝ ես և դասախոս Խորիկյանը հափշտակել ենք ԲՈւՀ-ի գույքը, մինչդեռ որևէ ապացույց չկա: Համալսարանի գրադարանային ֆոնդի կեսից ավելին ոչնչացվել է ռեկտոր Մինասյանի կողմից, ուղարկվել է մակուլատուրա, բայց պարզվում է, որ հափշտակել ենք մենք: Այսինքն՝ ռեկտոր Մինասյանն իր սեփական հանցագործությունները, որոնց մասին ես պարբերաբար բարձրաձայնում էի, բարդում է մեզ վրա՝ փորձելով մեզ մեղադրել: Նշվում է նաև աշխատանքում թերությունների մասին, որոնցից մենք տեղյակ չենք»,- ասաց նա:

Նրա կարծիքով՝ այս ամենի հեղինակը միայն ՇՊՀ-ի ռեկտորը չէ. «Այս բեսպրեդելության հեղինակը նաև ռեկտորի վերադաս ԿԳ նախարար Լևոն Մկրտչյանն է: Բազմաթիվ ապացույցներ կան, որ նա է խորհուրդ տալիս ռեկտորին մեզ հետ նման հաշվեհարդար տեսնել: Մեր բուհում Մինասյանի յուրայինները բացահայտ նշում են, որ այս ամենի ետևում կանգնած է հենց Լևոն Մկրտչյանը»,- նշեց Համբարյանը:

Համբարյանի խոսքով՝ այս ամենն արվեց այն պարզ պատճառով, որ իրենք հանդգնեցին բարձրաձայնել ԲՈւՀ-ում կատարված հանցագործությունների և ապօրինությունների մասին. «ԿԳ նախարար Լևոն Մկրտչյանը կեղծիքների միջոցով ՇՊՀ-ին ներկայացրել է լիցենզիաներ, որի իրավունքը ԲՈւՀ-ը չուներ: Այս ամենն էլ արվեց նրա համար, քանի որ Նախարարը չի ուզում, որ այդ կեղծիքները բացահայտվեն»,- ասաց Շիրակի պետական համալսարանի արդեն նախկին դասախոսը՝ ընդգծելով, որ իրենք կդիմեն դատարան:

Սոնա Հարութունյան