Կրկին հասկացնում են՝ գուդբա՛յ, Արգամիչ...

Վերլուծական 16 Մարտ, 2018 18:00

Մամուլում տեղեկություններ են տարածվել, թե մարտի 14-ին նախագահական նստավայր է այցելել նախկին վարչապետ Հովիկ Աբրահամյանը և հանդիպել Սերժ Սարգսյանի հետ: Թե ինչ հարցեր են քննարկել այդ հանդիպման ժամանակ, հայտնի չէ, սակայն լրագրողական համայնքը շտապեց ենթադրել՝ հանդիպման արդյունքում գետից հեռացած առվակը կարող է կրկին կպչել մայր գետին: Իրականում, հայտնի չէ՝ Արգամիչն ի՞նքն է գնացել Բաղրամյան, թե՞ «մայր գետը» առվակին բերման է ենթարկել՝ բացատրական աշխատանքներ տանելու նպատակով: Թերևս, ՀՀԿ վերնախավին լրջորեն զայրացրել են Հանրապետականից «վտակված», «մայր գետին» միանալու բոլոր հույսերը կորցրած, Արարատի մարզը մեկընդմիշտ կորցրած Հովիկ Աբրահամյանի վերջին ակտիվացումները՝ քաղաքական մարգինալների միջոցով։ Չնայած Արգամիչն այստեղ, այլուր և ամենուր պնդում է, թե ինքն այլևս չի զբաղվի քաղաքականությամբ, ու իրեն շատ լավ է զգում նոր կարգավիճակում, զի յուր բիզնեսներով է զբաղված, այնուհանդերձ, իշխանությունները շատ լավ գիտեն, թե ինչով է նա «զբաղված» և «ումով», հետևաբար, չի բացառվում, որ քաղաքական որոշում կա` եթե նա մի քիչ էլ խորանա, ապա նրա իշխանազրկումը կավարտվի նաև ունեզրկումով։ Այս գործընթացը, ի դեպ, արդեն սկսված է:

Կարծես թե «մայր գետը» այս անգամ լրջորեն է տրամադրված: Օրերս ստուգումներ են եղել Աբրահամյանի «օբյեկտներում», հատկապես՝ «Նացիոնալ» հյուրանոցային համալիրում․ Ճիշտ է` ակտի թիվը մեծ չէ` 8 միլիոն դրամ, այս պահին Աբրահամյանին ընդամենը զգուշացնում են, սակայն քաղաքական ենթատեքստը թափանցիկ է․ առաջիկայում սպասվող ակտիվ քաղաքական զարգացումների ֆոնին խելոք նստել տեղը և խաղեր չտալ: Բացի այդ, օրերս Կոտայքի հարկային տեսչության պետի պաշտոնին հրաժեշտ է տվել Հովիկ Աբրահամյանի փեսայի եղբայրը՝ Վարդան Մամիկոնյանը, որն անհիշելի ժամանակներից հարկայինում էր աշխատում։ Այս ամենը տեղի էր ունեցել մինչ Հովիկ Աբրահամյանի Բաղրամյան 26 կատարած ենթադրյալ այցը: Գուցե Արգամիչը ճանապարհ էր կտրել, հասել կարմիր գորգին՝ հենց իր և բարեկամների համար բարեխոսելո՞ւ: Սակայն դրանից հետո էլ Աբրահամյանի արշալույսները չեն խաղաղվում: Առավոտյան տեղեկատվություն տարածվեց, որ նախկին վարչապետին պատկանող գործարանի 66 բաժնետոմս գնած քաղաքացին պատրաստվում է դատական հայցերի շարք սկսել ընդդեմ Աբրահամյանի՝ վերջինիս մեղադրելով իրեն «քցելու» և բաժնետոմսերի մասին ՀՀ օրենքը խախտելու մեջ: Այսինքն, Արգամիչին հիշեցնում են մութ անցյալը, և թերևս միայն ինքն ու հիշեցնողները գիտեն՝ ինչեր դեռևս այնտեղից հնարավոր կլինի պեղել և «հրամցնել» հանրությանը: Բայց փաստը մնում է փաստ՝ Բաղրամյան կատարված այցը անպտուղ է եղել:

Ի դեպ, հաշվի առնելով նախկին վարչապետի պալատային ինտրիգների հանդեպ ունեցած մեծ սերը, չի կարելի բացառել, որ Բաղրամյան 26-ում իր և Նախագահի հանդիպման մասին լուրերը տարածում է հենց Արգամիչը, փորձելով այդպես տպավորություն ստեղծել, որ ինքը դեռ «այնքան կա», որ կարողանում է անգամ Սերժ Սարգսյանի մոտ աուդենցիայի արժանանալ:

Իհարկե, պատահական չէ, որ Արգամիչի կյանքում նման թարս երևույթներ են տեղի ունենում: Ով-ով, սակայն նախկին վարչապետը պետք է որ փայլուն հասկանա իրեն ուղղված մեսիջները:

Ստելլա Խաչատրյան