Ամենա-ամենա-ամենա պրոֆեսիոնալը Սերժ Սարգսյանն է

Հանրապետության նախագահ Սերժ Սարգսյանը երեկ հարցազրույց է տվել Թերթ․am-ին և պատասխանել վերջին շրջանում ամենաշատ քննարկումների առիթ տված՝ իր վարչապետության մասին հարցին։ 

Այսօր Ազգային ժողովում պատգամավորները շտապեցին լրագրողների համար ցիտել նախագահի հարցազրույցից հատվածներ և կրկնել, որ Սերժ Սարգսյանն ինչ ասել է, ճիշտ է ասել և իրենք, որպես Հանրապետական պատգամավորներ, պատրաստվում են այդ բացառիկ ղեկավարին ևս մեկ անգամ վստահել երկրի կառավարման ղեկը։

Նախագահ Սարգսյանին փառաբանելու սուրբ գործին լծված Ազգային ժողովի փոխխոսնակ Էդուարդ Շարմազանովը նշեց, որ իր համար Սերժ Սարգսյանի՝ հնարավոր վարչապետության մասին տված պատասխանն ավելի քան սպառիչ է, որոնց տակ որևէ տողատակ թաքնված չէ․ «Պարոն Նախագահն ասաց, որ ինքն այսօր հավակնություն չունի դառնալ Հանրապետության վարչապետ, բայց ինքն այն պետական գործիչն է, ով մշտապես իր հավակնություններն ավելի ցածր է դասում, քան պետական շահը։ Մենք մեր կարծիքը նշել ենք և կընդունենք այնպիսի որոշում, որը կբխի պետության շահից»,-այսօր Ազգային ժողովում Սերժ Սարգսյանի տված հարցազրույցին անդրադառնալով, ասաց Շարմազանովը՝ ընդգծելով, որ ՀՀ-ում գործող քաղաքական գործիչների թվում ավելի պատրաստված, ավելի փորձառու, Հայաստանի գործադիր իշխանությունը կառավարելու ավելի լավ փորձով, ավելի պրոֆեսիոնալ գործիչ մենք այսօր չունենք։

Նա խորհուրդ տվեց լրագրողներին՝ պարոն Նախագահի խոսքերը մեջբերելիս լինել առավել զգոն և ուշադիր․ «Երբ պարոն Նախագահին մեջբերում եք՝ նաև նրա ասած հաջորդ նախադասությունը մեջբերեք, որտեղ նա նշել է, որ Հանրապետական կուսակցությունում ինստիտուցիաոնալ որոշում այս մասով դեռ չկա»,-ասաց Շարմազանովն՝ ի պատասխան հարցին՝ ինչո՞ւ ներկուսակցական քննարկում մինչ այս պահը չի եղել, ինչի մասին նշել է նախագահն իր հարցազրույցում։ 

Հարցին՝ այս պարագայում ինչպե՞ս վարվել Սերժ Սարգսյանի՝ 2014 թվականին արած հայտարարության հետ, որտեղ նա նշել էր, որ չի ցանկանում նորից պաշտոնավարել, Շարմազանովը նշեց. «Դրա մասին խոսել ենք, երբ որոշումը կայացնենք, կգանք  բոլոր հարցերին կպատասխանենք»։

Շարմազանովի համար Սերժ Սարգսյանը նաև այն առաջնորդն է, որ ով պետք է լիդերներ կերտի, ինչն իր մոտ շատ լավ է ստացվում և որպես ասածն ապացուցող փաստ՝ բերեց Արփինե Հովհաննիսյանի օրինակը։