Պոչամբարները խժռում են մեր անտառները. տիեզերքից արված նկարները սարսափելի են

«Պոչամբարները խժռում են մեր անտառները և հույս ունեմ, որ Թեղուտի օրինակը մեզ համար լավ դաս կլինի, հակառակ պարագայում, երբ նայում եմ տիեզերքից արված նկարներին, մեր անտառների վիճակը սարսափելի է: Հույս ունեմ, որ մեր մեջ կբարձրանա էկոլոգիական դաստիարակությունը, որի համար մենք երկար տարիներ պայքարում ենք Էկոլոգիա առարկան դպրոց մտցնելու համար, սակայն այս հարցում դեռևս Կրթության նախարարությունը մեզ հետ համամիտ չէ»,-այսօր Անտառային պետական կոմտեի 2018-2021 թթ. զարգացման ծրագրի ներկայացման ժամանակ ասաց բնապահպան Կարինե Դանիելյանը: 

Վերջինս նշեց, որ այն լոզունգները, որոնք իրականացնում է Անտառային պետական կոմտեն և Բնապահպանության նախարարությունը, դեռևս բավարար չեն ապահով էկո միջավայր ձևավորելու համար և հույս հայտնեց, որ այս առումով պատկան կառույցները կիրականացնեն համակարգային փոփոխություններ: 

Նշենք, որ Անտառային պետական կոմիտեի 2018-2021 թթ. ծրագրի բացմանը ելույթ ունեցավ ՀՀ բնապահպանության նախարար Արծվիկ Մինասյանը և նշեց, որ իրականացվելու են բոլոր անհրաժեշտ միջոցառումները՝ անտառային տարածքների պահպանման, զբոսաշրջության զարգացման համար, իսկ անտառ մտնող և ապօրինի անտառհատումներ իրականացնողները կենթարկվեն խիստ պատիժների: 

 Աղավնի Սուքիասյան