«Գառնի»-ում նշվել է Ամանորն ու Վահագնի ծնունդը

«Գառնի» պատմամշակութային արգելոց-թանգարանում ավանդույթի համաձայն մարտի 21-ին հավաքվել են «Արորդիների Ուխտ» կազմակերպության անդամները` նշելու  հեթանոսական տոներից մեկը` Ամանորն ու Վահագնի ծնունդը: «Արորդիների Ուխտ»-ի անդամները մարտի 20-ի լույս 21-ի արևածագը դիմավորել են  «Գառնի»-ում: Այս մասին  տեղեկացրին «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ից՝ հավելելով.  «Կեսօրին արդեն սկսվել  են բուն միջոցառումները,  այդ  թվում  օծվել ու մասնակիցներին է բաժանվել տարեհաց:  Ներկաները նաև ցանկություն պահելով՝ գունավոր ժապավենի մի  կտոր են  կապել  Կենաց  ծառը խորհրդանշող  ծիրանենու  ճյուղերին:

Ծիսական արարողությունն ու տոնակատարությունն ուղեկցվել է ազգային երգ ու պարով: Կատարումներով հանդես են եկել  Գառնի համայնքի մշակույթի պալատի սաները: Միջոցառումը տպավորել է  նաև  օտարեկրացի զբոսաշրջիկներին:

«Պահպանության ծառայություն» ՊՈԱԿ-ի տնօրինության ներկայությունը միջոցառմանը` «Արորդիների Ուխտ»-ի  և ՊՈԱԿ-ի միջև  ձևավորված ջերմ համագործակցության վկայությունն է»: