Կաշկանդված նախարարը. Հարությունյանը հասավ իր «մուրազին»

Վերլուծական 23 Մարտ, 2018 21:30

«Կառավարության կառուցվածքի և գործունեության մասին օրենքը» և կից ներկայացված տասնյակ օրենքներն այսօր ԱԺ արտահերթ նիստում երկրորդ ընթերցմամբ քննարկվեց: Արդարադատության նախարար Դավիթ Հարությունյանը, որը հիմնական զեկուցողն էր հարցի, անդրադարձավ այն փոփոխություններին, որոնք երեկվանից դարձել են բուռն քննարկման և քննադատության առարկա: Ինչպես երեկ տեղեկացրել էինք, Երևանի ավագանու նիստերը լուսաբանման համար դառնում են որոշակիորեն սահմանափակ, այսինքն՝ լրագրողներն այլեւս չեն մասնակցելու նիստերին, միայն հետևելու են ուղիղ հեռարձակմամբ:

Ընդամենը մեկ շաբաթ առաջ ՄԻՊ Արման Թաթոյանը հիշեցրել էր իր գոյության մասին, խիստ գնահատական հնչեցնելով Դավիթ Հարությունյանի այս նախագծի վերաբերյալ: ՄԻՊ-ի համար անթույլատրելի է Երևանի ավագանու նիստերի՝ լրագրողների համար դռնփակ դարձնելը: Ինչպես երևում է՝ Թաթոյանը սրտնեղում է, ոչ այնքան լրագրողների, այլ իր համար: Չէ՞ որ Դավիթ Հարությունյանի ծնած մեկ այլ նախագծով ՄԻՊ-ի համար կառավարության նիստերը նույնպես դռնփակ են դառնալու: Ստացվում է՝ ոչ միայն լրագրողներն են պաշտոնյաներին շեղում բուռն և բեղմնավոր աշխատանքից, այլ նաև Արման Թաթոյանը: Արդյունքում վերջինս բավական կոշտ հայտարարություն է արել, սակայն Թաթոյանի՝ անգամ տարին մեկ անգամ արված հայտարարությունը բանի տեղ դնող չկա՝ օրինագիծը ընդունվեց և լրագրողները այսուհետ էլ ավելի են օտարվելու պետական համակարգից: Սա թերևս առաջին դեպքն է, երբ ՄԻՊ-ը մատը մատին խփեց, այն էլ ապարդյուն: Հետևաբար լրագրողների թիրախում հայտնվում է հենց Դավիթ Հարությունյանը: Բայց նախարարը առաջին անգամ չէ, որ ստիպված է լինելու պաշտանվել լրագրողական համայնքի գրոհներից:

Ինչպես հիշում ենք, անցած տարվա կեսին նախարարությունը շրջանառության մեջ էր դրել մի նախագիծ, համաձայն որի «Տեղեկատվության ազատության մասին» օրենքը պետք է վերաբերի միայն այն պետական մարմինների գործունեությանը, որոնց աշխատակազմը 50 հոգուց ավելի է: Հարվածների տարափի տակ նա մի փոքր էլ մտածեց ու որոշեց, որ իրավիճակից քիչ վնասվածքներով դուրս գալու լավագույն տարբերակը սուտ խոսելն է: Ու հենց այդպես էլ արեց: Իր հրավիրած ասուլիսում Դավիթ Հարությունյանը հայտարարեց, թե պատկերացում անգամ չունի այդ նախագծի մասին, և «նախագիծը, որը դրվել է շրջանառության, անհայտ ծագման է»: Մեզ մնում է սպասել և հասկանալ՝ ինչպիսի՛ն է լինելու Հարությունյանի հերթական «կրուտիտը»:

Ստելլա Խաչատրյան