Հավակնորդների մրցաշար. ամեն ինչ ծայրաստիճան խճճվեց

Բեռլինում կայացավ շախմատի աշխարհի չեմպիոնի հավակնորդների մրցաշարի 12-րդ տուրը:

Հայաստանի առաջատար գրոսմայստեր Լևոն Արոնյանը սև խաղաքարերով ոչ-ոքի խաղաց ռուսաստանցի Ալեքսանդր Գրիշչուկի հետ: 

Եթե Արոնյանի դեպքում այս ոչ-ոքին մրցաշարային առումով որևէ նշանակություն չունի, ապա տուրի մյուս պարտիաների արդյունքները ծայրահեղ խճճեցին մրցաշարային իրավիճակը:

Մինչև այս տուրն առանց պարտության ընթացող ամերիկացի գրոսմայստեր Ֆաբիանո Կարուանան, որը միանձնյա առաջատարն էր, և նրան հետապնդող ադրբեջանցի Մամեդյարովը համերաշխորեն պարտություններ կրեցին:

Կարուանան սևերով պարտվեց ռուսաստանցի Կարյակինին, որը ոչ այնքան հաջող մեկնարկից հետո՝ 2 պարտություն, այնպիսի թափ հավաքեց, որ ետնապահների շարքերից հասավ Կարուանային՝ 4 հաղթանակ տանելով և այժմ ամերիկացու հետ առաջատարն է:

Իր հերթին Մամեդյարով սպիտակներով պարտվեց չինացի Դին Լիրենին, որի համար էլ սա առաջին հաղթանակն էր և չինացին էլ միացավ չեմպիոնի համար պայքարին:

Արդյունքում՝ մրցաշարի ավարտից 2 տուր առաջ հաղթողի համար պայքարում զարմանալի ինտրիգ առաջացավ: Միանգամից հինգ գրոսմայստեր հավակնում են չեմպիոնի կոչմանը: Նույնիսկ դժվար է պատկերացնել, թե ինչ է սպասվում եզրափակիչ տուրերում: Յուրաքաչյուր պարտիա եզրափակչի կարգավիճակ է ունենալու, ամեն միավորը ոսկու արժեք կստանա:

Վերջին ճակատամարտերից առաջ այսօր մրցաշարում հանգստյան օր է:

Հավակնորդների մրցաշար, 12-րդ տուր

Ալեքսանդր Գրիշչուկ (Ռուսաստան) - Լևոն Արոնյան (Հայաստան)՝ 0.5:0.5
Սերգեյ Կարյակին (Ռուսաստան) - Ֆաբիանո Կարուանա (ԱՄՆ)՝ 1:0
Վլադիմիր Կրամնիկ (Ռուսաստան) - Ուեսլի Սո (ԱՄՆ)՝ 0.5:0.5
Շաքրիյար Մամեդյարով (Ադրբեջան) - Դին Լիրեն (Չինաստան)՝ 0:1

Մրցաշարային դրությունը 12-րդ տուրից հետո. Կարյակին, Կարուանա՝ 7-ական միավոր, Դին Լիրեն, Գրիշչուկ, Մամեդյարով՝ 6.5-ական, Կրամնիկ՝ 5.5, Սո՝ 5, Արոնյան՝ 4: