Երևանում վթարի է ենթարկվել թիվ 57 երթուղայինը. վարորդը մեքենան վարել է առանց համապատասխան իրավունքի

Այսօր, ժամը 09։40-ի սահմաններում, Երևանյան լճի կամրջի վրա բախվել են 33-ամյա Մուշեղ Մերկիբոսյանի վարած Газ 32213 մակնիշի 0859 Տ համարանիշի և 39-ամյա Արման Սիմոնյանի վարած Mercedes մակնիշի 35 QC 671 համարանիշի ավտոմեքենաները։

Ըստ տեղեկությունների՝ վթարի հետևանքով 8 հոգի մարմնական տարբեր վնասվածքներով տեղափոխվել են հիվանդանոց։ ԼՈւՐԵՐ.com-ի թղթակցի հետ զրույցում «Էրեբունի» բժշկական կենտրոնի տնօրեն Միքայել Մանուկյանն ասաց, որ առավոտյան իրենց մոտ տեղափոխված երկու տուժածները համապատասխան բուժօգնություն ստանալուց հետո դուրս են գրվել հիվանդանոցից:

Որոշ տեղեկություններով՝ Газель-ը սպասարկում է թիվ 57 երթուղին, իսկ վարորդի վարորդական իրավունքի վկայականի ժամկետն անցած է, և նա իրավունք չի ունեցել մարդատար Газель վարելու, քանի որ, պարզվել է, որ նա վարորդական իրավունքի համապատասխան կարգ չունի։ բացի դրանից՝ վարորդի ձախ ձեռքը հաշմանդամ է։ 

Իսկ թե ինչն է վթարի պատճառը՝ ճշտվում է: