15 մլն եվրոյով Երևանի մետրոն կարգի կբերեն

Իսպանական «Ագազոս» ընկերությունը Երևանի մետրոյում իրականացնում է վերականգնման աշխատանքներ, որոնց մեկնարկը տրվել է 2012 թվականին: Վերականգնման աշխատանքների առաջին փուլի ավարտից հետո սկսվել է երկրորդ փուլը, որի վերաբերյալ որոշման նախագիծն ընդգրկված է Կառավարության ՀՀ Կառավարության մարտի 29-ի նիստի օրակարգում:

Թե ինչ վերականգնման աշխատանքների մասին է խոսքը, ովքեր են դրանք իրականացնում, ինչ ֆինանսավորման շրջանակներում՝  ԼՈւՐԵՐ.com-ը փորձեց պարզել Երևանի մետրոպոլիտենից, որտեղից ստացված պատասխանը ներկայացնում ենք ստորև.

««Երևանի մետրոյի վերակառուցման ծրագրի» Փուլ II –ի շրջանակներում (ֆինանսական միջոցները տրամադրել են ՎԶԵԲ՝ վարկ 5 մլն եվրո, ԵՆԲ վարկ՝ 5 մլն եվրո, Եվրամիության Հարևանության ներդրումային գործիք՝ դրամաշնորհ՝ 5 մլն եվրո) «Կարեն Դեմիրճյանի անվան Երևանի մետրոպոլիտեն» ՓԲԸ և իսպանական «Ագազոս» ընկերության միջև ստորագրված պայմանագրով, «Ագազոսը» իրականացնում է Երևանի մետրոյի դրենաժային թունելի երկարացման և մետրոյի վազորդային թունելներում վերականգնողական աշխատանքները։ Պայմանագիրը կնքվել է 2015 թ․-ի ապրիլին։

Իսպանական կազմակերպությունը իրականացնում է գոյություն ունեցող դրենաժային թունելի մոտավորապես 1 կմ երկարացման աշխատանքները, որը II-րդ Փուլի ամենածավալուն բաղադրիչն է։  Դրենաժային թունելի երակարցման շնորհիվ հնարավոր կլինի հասնել զգալի խնայողությունների՝ ներհոսող ջրի արտամղման համար էլեկտրաէներգիայի ծախսերի, ինչպես նաև սպասարկող անձնակազմի զգալի կրճատման:

«Երևանի մետրոյի վերակառուցման ծրագրի» Փուլ II –ը սկսվել է 2012․թ-ին և հաջորդել է «Երևանի մետրոպոլիտենի վերականգնման ծրագրի» Փուլ I-ին (ֆինանսական միջոցները նույնպես տրամադրել էին ՎԶԵԲ՝ վարկ 5 մլն եվրո, ԵՆԲ վարկ՝ 5 մլն եվրո, Եվրամիության Հարևանության ներդրումային գործիք՝ դրամաշնորհ՝ 5 մլն եվրո), որի շնորհիվ հնարավոր եղավ զգալի բարելավել մետրոյի անվտանգությունը, էլեկտրահամակարգի կայունությունն, արդյունավետությունը, կապիտալ վերանորոգել և արդիականացնել մետրոյի վագոնները: 

Փուլ II-ի շրջանակներում նույնպես վերանորոգվել և արդիականացվել են  մետրոյի  բազմաթիվ վագոններ, հիմնվել է մեքենավարների ուսուցման կենտրոն, ձեռք են բերվել հակահրդեհային սարքավորումներ, կառուցվել է վագոնների լվացման կայան»:

Նշենք, որ նախագիծը ներառված է Կառավարության՝ մարտի 29-ի նիստի օրակարգում, որը կզեկուցի քաղաքապետ Տարոն Մարգարյանը։